جامعہ گوادر اور نیب بلوچستان کے اشتراک سے انٹر یونیورسٹی اینٹی کرپشن آگاہی مقابلوں کا انعقادکیا گیا

کوئٹہ ( اباسین خبر)جامعہ گوادر کے زیر اہتمام نیشنل اکانٹیبلٹی بیورو (نیب) بلوچستان کے تعاون سے انٹر یونیورسٹی اینٹی کرپشن آگاہی مقابلوں کا انعقاد کیا گیا۔ یہ مقابلے گوادر یونیورسٹی کے سیمینار ہال میں ہوئے، جس میں یونیورسٹی آف گوادر، یونیورسٹی آف تربت اور لسبیلہ یونیورسٹی آف ایگریکلچر واٹر اینڈ میرین سائنسز کے طلبا نے شرکت کی۔تقریب کے مہمان خصوصی وائس چانسلر پروفیسر ڈاکٹر عبدالرزاق صابر تھے، جبکہ نیب گوادر کے اسسٹنٹ ڈائریکٹر انوسٹیگیشن وحید احمد چوہدری اور سینئر اسپیشل پروسیکیوٹر شئے خالد حسین بھی موجود تھے۔ تقریب میں فیکلٹی ممبرز اور بڑی تعداد میں طلبا نے شرکت کی۔مقابلوں میں اردو اور انگریزی تقریری مقابلے، پوسٹر سازی اور مختصر فلم سازی کے مقابلے شامل تھے، جن کا مقصد نوجوانوں کو بدعنوانی کے خلاف آگاہی فراہم کرنا اور معاشرتی سطح پر ایمانداری و شفافیت کو فروغ دینا تھا۔تقریری مقابلوں میں طلبا نے کرپشن کے منفی اثرات اور سماج میں اخلاقی قیادت اور جوابدہی کی ضرورت پر روشنی ڈالی۔ پوسٹر سازی کے مقابلے میں طلبا نے ایمانداری، انصاف اور شفافیت کے پیغامات کو تخلیقی انداز میں اجاگر کیا۔ مختصر فلم سازی کے مقابلے میں طلبا نے کرپشن کے خلاف کہانیاں تخلیق کر کے اس اہم موضوع کو نیا رنگ دیا۔اختتامی تقریب سے خطاب کرتے ہوئے وائس چانسلر پروفیسر ڈاکٹر عبدالرزاق صابر نے نیب بلوچستان اور یونیورسٹی کے اشتراک کی اہمیت کو اجاگر کیا اور طلبا کی شراکت کو سراہا۔ انہوں نے کہا، “بدعنوانی کا خاتمہ نوجوانوں کے عزم کے بغیر ممکن نہیں، اور یہ مقابلے اس شعور کو اجاگر کرنے میں اہم قدم ہیں۔”شئے خالد حسین نے نیب کی کارکردگی اور اس کے بدعنوانی کے خلاف اقدامات پر تبادلہ خیال کیا، اور پاکستان میں شفافیت اور احتساب کے ادارے کے طور پر نیب کے کردار کو اہم قرار دیا۔