پنجاب نے اپنے بجٹ سے عوام کو ریلیف دیا، وفاق کا کوئی لینا دینا نہیں، وزیراعظم

اسلام آباد (مانیٹر نگ ڈیسک)وزیراعظم شہباز شریف نے کہا ہے کہ وزیراعلی پنجاب نے صوبے کے عوام کو ترقیاتی فنڈز میں سے 45 ارب روپے کا ریلیف دیا، اس سے وفاق کا کوئی لینا دینا نہیں جب کہ خیبرپختونخوا سمیت دیگر صوبے بھی بسم اللہ کریں اور پنجاب کی طرح اپنے عوام کو ریلیف دیں لیکن اس معاملے پر سیاست سے گریز کریں۔وزیراعظم شہباز شریف نے وفاقی کابینہ اجلاس میں گفتگو کرتے ہوئے کہا کہ حالیہ بارشوں سے جانی ومالی نقصانات ہوئے اور بارشوں سے سڑکوں اور پلوں کو بھی نقصان پہنچا تاہم نیشنل ڈیزاسٹر مینجمنٹ (این ڈی ایم اے) نے اچھا کام کیا۔انہوں نے کہا کہ این ڈی ایم اے نے صوبائی حکومتوں اور صوبائی ڈیزاسٹر مینجمنٹ اتھارٹی (پی ڈی ایم اے) کے ساتھ اچھی کوآرڈینیشن کی، مشترکہ کاوشوں سے صورتحال کو کنٹرول کرنے میں بہت فائدہ ہوا۔شہباز شریف نے کہا کہ آج گزشتہ 3 سال کے مقابلے میں مہنگائی کم ترین سطح پر ہے، 38 فیصد سے کم ہوکر ساڑھے 11 فیصد پر آگئی ہے لیکن یہ ابھی کافی نہیں، ہمیں مزید کام کرنا ہے، مگر ہمیں بہت سے مسائل کا سامنا ہے، جس سے نمٹ رہے ہیں۔ان کا کہنا تھا کہ آئی ایم ایف کے ساتھ سٹاف لیول معاہدہ ہوچکا ہے، ٹیکس ریونیو جمع کرنے کے لئے دن رات محنت کرنا ہوگی، ایف بی آر کی جانب سے پاور سیکٹر میں نقصانات میں کمی لانے کے لئے اقدامات کئے جارہے ہیں۔انہوں نے کہا کہ پی ایس ڈی پی کے بجٹ میں 50 ارب کی کٹوتی کرکے بجلی کے بلوں میں 200 یونٹ والے گھریلو صارفین کو 3 ماہ کے لئے ریلیف دیا۔ جبکہ پنجاب حکومت نے اپنے وسائل سے 200 سے500 یونٹ بجلی صارفین کو ریلیف دیا۔وزیراعظم نے کہا کہ نوازشریف نے وزیراعلی مریم نواز کے ہمراہ پنجاب کے عوام کو ریلیف کا اعلان کیا، پنجاب حکومت نے بجلی کے بلوں میں جو ریلیف دیا اس میں وفاق کا حصہ نہیں ہے۔انہوں نے کہا کہ صوبوں کو این ایف سی کے تحت صوبوں کو بہت سے وسائل ملتے ہیں، دوسرے صوبے بھی بسم اللہ کریں اور اپنے عوام کو ریلیف دیں، پنجاب کی طرح دیگر صوبے بھی بسم اللہ کریں اور عوام کو ریلیف دیں، ریلیف کے معاملے پر سیاست سے گریز کیا جانا چاہئے۔ان کا کہنا تھا کہ ہم نے بلوچستان کی حکومت کے ساتھ ایک شراکت کرکے وہاں پر 28 ہزار بجلی سے چلنے والے ٹیوب ویلز کو شمسی توانائی پر منتقل کرنے کے لئے 70 ارب روپے کا منصوبہ بنایا اور اس میں وفاق کا حصہ 55 ارب روپے کا ہے، باقی خرچہ صوبائی حکومت اٹھائے گی۔شہباز شریف نے کہا کہ ہم صوبوں کے ساتھ مشاورت کے ذریعے دن رات کام کرکے چیلنجزسے نمٹنے کی کوشش کررہے ہیں اور ہم آئی ایم ایف کو آن بورڈ لے کر سارے فیصلے کریں گے۔