دہشت گردی کی عفریت کے مکمل خاتمے تک اس کے خلاف جنگ جاری رہے گی:گورنر پنجاب

لاہور ( اباسین خبر)گورنر پنجاب سردار سلیم حیدر خان نے کہا ہے کہ دہشت گردی کے حالیہ واقعات دہشت گردوں کا بزدلانہ فعل ہیں، اور افواج پاکستان بہادری سے دشمن عناصر کا مقابلہ کر رہی ہیں۔ انہوں نے کہا کہ وطن کی خاطر اگر انہیں بھی قربان ہونا پڑا تو وہ دریغ نہیں کریں گے۔وفاقی ٹیکس محتسب کے زیر اہتمام گورنر ہاس لاہور میں سیمینار کا انعقاد کیا گیا، جس میں ادارے کے سربراہ ڈاکٹر آصف محمود جاہ اور دیگر شخصیات بھی موجود تھیں۔ گورنر پنجاب نے کہا کہ دہشت گردی کی عفریت کے مکمل خاتمے تک اس کے خلاف جنگ جاری رہے گی اور پوری قوم افواج پاکستان کے ساتھ شانہ بشانہ کھڑی ہے۔انہوں نے مزید کہا کہ وفاقی محتسب ٹیکس کے شعبے میں لوگوں کو ریلیف دینے میں ایک اہم اور طاقت ور ادارہ ہے۔ قومی ادارے ملک کی ترقی میں اپنا کردار احسن طریقے سے ادا کر رہے ہیں، اور لوگوں کو ٹیکس نیٹ ورک میں لانے سے ملک میں بیروزگاری کا خاتمہ ممکن ہو سکتا ہے، جس سے ملکی معیشت مستحکم ہوگی۔گورنر پنجاب نے کہا کہ لوگوں کو ٹیکس کے بارے میں آگاہی دینے کی ضرورت ہے تاکہ وہ اس سے مستفید ہو سکیں۔ سیمینار کے اختتام پر ادارے کے سربراہ ڈاکٹر آصف محمود جاہ نے ادارے کی سالانہ رپورٹ بھی پیش کی۔