اسٹار شپ راکٹ 2026 میں مریخ کی طرف روانہ، آپٹیمس روبوٹ کی پرواز کی متوقع

واشنگٹن( ماینٹرنگ ڈیسک) سپیس ایکس کے بانی ایلون مسک نے اعلان کیا ہے کہ ان کا طاقتور “اسٹار شپ” راکٹ اگلے سال کے آخر میں مریخ کے لیے روانہ ہوگا، جس میں ٹیسلا کے انسان نما روبوٹ “آپٹیمس” سوار ہوں گے۔ مسک کے مطابق، یہ راکٹ 2026 کے آخر میں مریخ روانہ ہوگا اور 2029 تک انسانوں کی پہلی پرواز ممکن ہو سکتی ہے، حالانکہ 2031 میں انسانوں کی مریخ پر لینڈنگ کا زیادہ امکان ہے۔ایلون مسک نے اپنے سوشل میڈیا پلیٹ فارم “ایکس” پر بتایا کہ اگر یہ لینڈنگ کامیاب ہو گئی تو انسانی مشن 2029 میں شروع کیا جا سکتا ہے، مگر 2031 تک انسانوں کی مریخ پر موجودگی کے امکانات زیادہ ہیں۔گزشتہ سال ایلون مسک نے ٹیسلا کے “آپٹیمس” روبوٹ متعارف کرائے تھے، جنہوں نے رقص کرنے سمیت مختلف معمولی کاموں میں حصہ لیا تھا۔ مسک نے کہا تھا کہ یہ روبوٹ انسانوں سے دوستی کی پیشکش بھی کر سکتے ہیں اور ان کی قیمت 20,000 سے 30,000 ڈالر کے درمیان ہو سکتی ہے۔اسٹار شپ راکٹ، جو دنیا کا سب سے بڑا اور طاقتور ترین راکٹ ہے، ایلون مسک کے مریخ پر نوآبادیات کے طویل مدتی وژن کا اہم حصہ ہے۔ 403 فٹ لمبا اسٹار شپ راکٹ مکمل طور پر دوبارہ قابل استعمال ہونے کے لیے ڈیزائن کیا گیا ہے۔ مزید برآں، ناسا اپنے آرٹیمس پروگرام کے تحت اسٹار شپ کے ترمیم شدہ ورژن کا بھی انتظار کر رہا ہے، جس کا مقصد رواں دہائی میں چاند پر خلابازوں کو واپس بھیجنا ہے۔