فوجی کارروائیاں حالات کو مزید کشیدہ بنا سکتی ہیں ، امریکا اور یمنی حوثی حملے بند کریں، اقوام متحدہ

نیو یارک ( مانیٹرنگ ڈیسک)اقوام متحدہ نے یمن پر امریکی حملوں پر تشویش کا اظہار کرتے ہوئے امریکا اور یمنی حوثیوں سے ایک دوسرے پر حملے بند کرنے کی اپیل کی ہے۔ اقوام متحدہ کے ترجمان کا کہنا تھا کہ یمن میں جاری فوجی کارروائیاں حالات کو مزید کشیدہ بنا سکتی ہیں اور تصادم خطے کو جنگ کی آگ میں جھونک سکتا ہے۔ انہوں نے مزید کہا کہ مشرق وسطی کی صورتحال پہلے ہی عدم استحکام کا شکار ہے، اس لیے حملوں کے بجائے صبر و تحمل سے کام لینا ضروری ہے۔یاد رہے کہ امریکا نے گزشتہ روز یمن کے دارالحکومت صنعا پر فضائی حملے کیے تھے جس کے نتیجے میں کم از کم 24 افراد ہلاک اور متعدد زخمی ہو گئے۔ امریکا نے یمن کے مختلف علاقوں پر 170 سے زیادہ فضائی حملے کیے۔ ان حملوں کے جواب میں یمنی حوثیوں نے امریکی طیارہ بردار بحری جہاز ہیری ایس ٹرومین کو 18 بیلسٹک اور کروز میزائلوں اور ایک ڈرون سے نشانہ بنایا۔ امریکی وزیر خارجہ مارکو روبیو نے کہا ہے کہ یمن میں امریکی فوجی مہم اس وقت تک جاری رہے گی جب تک حوثی بحری جہازوں کو نشانہ بنانے کی صلاحیت کھو نہیں دیتے۔