یہاں جیتنے کے لیے آئے ہیں، فخر زمان اور صائم ایوب کی کمی پوری نہیں ہو سکے گی:نومنتخب کپتان سلمان علی آغا

کرائسٹ چرچ( سپورٹس ڈیسک) پاکستان ٹی 20 ٹیم کے نومنتخب کپتان سلمان علی آغا نے کہا ہے کہ ان کی ٹیم یہاں جیتنے کے لیے آئی ہے اور وہ اچھی کرکٹ کھیلیں گے، تاہم فخر زمان اور صائم ایوب کی کمی محسوس ہو گی۔کرائسٹ چرچ میں پریس کانفرنس کرتے ہوئے سلمان علی آغا نے کہا کہ پاکستانی فینز ہم سے خوش نہیں ہیں کیونکہ ہم نے اچھی کرکٹ نہیں کھیلی، اور نہ ہی فینز کی توقعات کے مطابق کرکٹ کھیلی اور نہ ہی اپنے معیار کی کرکٹ پیش کی۔ تاہم انہوں نے یہ بھی کہا کہ ہماری ٹیم نئی ہے لیکن اس کا مطلب یہ نہیں کہ یہ اچھی ٹیم نہیں ہے، سینئر کھلاڑی بھی موجود ہیں اور ٹیم میں اچھا کمبی نیشن ہے۔سلمان علی آغا کا کہنا تھا کہ وہ یہاں جیتنے کے لیے آئے ہیں اور یقین رکھتے ہیں کہ ٹیم اچھی کرکٹ کھیلے گی۔ انہوں نے ہیگلے اوول گرانڈ کی پچ کا ذکر کرتے ہوئے کہا کہ بظاہر گرین پچ پر سپینرز کو بھی مدد ملے گی، جبکہ شاہین شاہ آفریدی اور حارث رف کی ٹی 20 کرکٹ میں کارکردگی بہتر ہے۔کپتان نے فخر زمان اور صائم ایوب کی کمی کو تسلیم کیا اور کہا کہ یہ دونوں کھلاڑی ٹیم کے اہم حصے ہیں، لیکن امید ہے کہ وہ جلد صحت یاب ہو کر آنے والی سیریز میں ٹیم کا حصہ ہوں گے۔ سلمان علی آغا نے بابر اعظم اور محمد رضوان کی خدمات کو سراہا اور کہا کہ نیا کمبی نیشن بنانے کی کوشش کی جا رہی ہے، تاہم پہلے میچ کے لیے پلیئنگ الیون کا فیصلہ ابھی نہیں کیا گیا۔