مسجد الحرام میں تیسری توسیع کے بعد بڑا حصہ نمازیوں کے لیے کھل گیا

ریاض ( مانیٹرنگ ڈیسک)مسجد الحرام میں تیسری توسیع کے بعد نماز کے لیے ایک بڑا حصہ کھول دیا گیا ہے۔ ادارہ امورِ حرمین کی جانب سے جاری ہونے والے بیان میں بتایا گیا ہے کہ یہ نیا حصہ رمضان المبارک کے دوران فرض نمازوں اور تراویح کے لیے کھولا گیا ہے۔ اس میں گراونڈ فلور، پہلی منزل، میزنائین، دوسری منزل، دوسری منزل میزنائین اور چھت کا حصہ شامل ہیں۔اس توسیع کا مجموعی رقبہ 12 لاکھ 14 ہزار مربع میٹر ہے۔ رمضان کے دوران توسیع شدہ حصوں میں 25 ہزار قالین بچھائے گئے ہیں اور 17 ہزار واٹر کولرز بھی نصب کیے گئے ہیں۔مسجد الحرام کی تیسری توسیع کا حکم سابق سعودی فرمانروا شاہ عبداللہ بن عبدالعزیز نے دیا تھا، اور یہ مسجد الحرام کی تاریخ کی سب سے بڑی توسیع ہے، جس کا آغاز جون 2010 میں ہوا تھا۔