پشاور ہائیکورٹ کا پی ٹی آئی رہنما فیصل جاوید کو گرفتار نہ کرنے کا حکم

پشاور( اباسین خبر)پشاور ہائیکورٹ نے پاکستان تحریک انصاف کے رہنما سینیٹر فیصل جاوید کو حفاظتی ضمانت دیتے ہوئے درج مقدمات میں گرفتار نہ کرنے کا حکم دے دیا۔پشاور ہائی کورٹ کے جسٹس صاحبزادہ اسد اللہ اور جسٹس ثابت اللہ نے سینیٹر فیصل جاوید کی مقدمات کی تفصیلات کے لیے دائر درخواست پر سماعت کی۔فیصل جاوید کے وکیل نے عدالت کو بتایا کہ مقدمات کی تفصیلات کے لیے درخواست دائر کی ہے۔ ڈپٹی اٹارنی جنرل ملک دانیال خان نے بتایا کہ فیصل جاوید کے خلاف اسلام آباد میں 16 ایف آئی آرز درج ہیں اور تفصیلات عدالت میں پیش کر دی گئی ہیں۔عدالت نے وفاقی حکومت سے کیسز کی رپورٹ طلب کی اور نیب کے وکیل نے بھی جواب جمع کرانے کی یقین دہانی کرائی۔جسٹس صاحبزادہ اسد اللہ نے فیصل جاوید کو 15 اپریل تک حفاظتی ضمانت دیتے ہوئے کہا کہ وہ عمرے کے لیے جا سکتے ہیں اور انہیں گرفتار نہیں کیا جائے گا۔