فولڈ ایبل اسکرین اور سولر پاور سے لیس 2 منفرد لیپ ٹاپس متعارف

بیجنگ ( مانیٹرنگ ڈیسک)ایک چینی کمپنی نے دو منفرد کانسیپٹ لیپ ٹاپس متعارف کرائے ہیں، جن میں سے ایک فولڈ ایبل اسکرین سے لیس ہے جبکہ دوسرے کی بیٹری کو سولر پاور سے چارج کیا جا سکتا ہے۔یہ دونوں لیپ ٹاپس ابھی کانسیپٹ ماڈلز ہیں، یعنی یہ عام افراد کے لیے دستیاب نہیں ہیں۔ کمپنی کی جانب سے ایسے جدید کانسیپٹ ماڈلز پیش کیے جاتے ہیں، جیسے کچھ عرصے قبل اس نے رول ایبل اسکرین والا لیپ ٹاپ متعارف کرایا تھا جس کی اسکرین اوپر کی جانب کھلتی تھی۔اب کمپنی نے ایک فولڈ ایبل اسکرین سے لیس تھنک بک فلپ لیپ ٹاپ متعارف کرایا ہے۔ جب اس لیپ ٹاپ کو مکمل طور پر ان فولڈ کیا جاتا ہے تو اس کی اسکرین 18 انچ کی ہو جاتی ہے۔ اس کے ڈسپلے کو درمیان سے فولڈ کرکے دو اسکرینیں بنائی جا سکتی ہیں، جن میں سے ایک فرنٹ پر اور دوسری پشت پر ظاہر ہوتی ہے۔ پورے ڈسپلے کو مکمل فولڈ کرکے اس لیپ ٹاپ کو ٹیبلیٹ کی شکل میں تبدیل کیا جا سکتا ہے۔ اگرچہ فولڈ ایبل اسمارٹ فونز عام ہو گئے ہیں، اتنی بڑی اسکرین والے فولڈ ایبل لیپ ٹاپ ابھی تک زیادہ نہیں ہیں۔کمپنی کے مطابق اس فولڈ ایبل لیپ ٹاپ کو عام صارفین کے لیے متعارف کرانے میں ابھی مزید کام کرنا ہوگا۔اسی طرح کمپنی نے ایک اور کانسیپٹ ماڈل “یوگا سولر” بھی پیش کیا ہے، جس کے بیک پر سولر پینلز نصب ہیں جو سورج کی روشنی کو جذب کر سکتے ہیں۔ اگرچہ یہ لیپ ٹاپ روایتی چارجر کے ساتھ زیادہ کام کرے گا، مگر سولر پاور کے ذریعے صارفین اس کو اس وقت زیادہ استعمال کر سکیں گے جب چارجنگ پوائنٹس دستیاب نہ ہوں، لیکن سورج کی روشنی موجود ہو۔ کمپنی کا دعوی ہے کہ اس لیپ ٹاپ کی بیٹری لائف عام روشنی جذب کرکے ایک گھنٹہ تک بڑھا سکتی ہے۔