سی ٹی ڈی کی کارروائی، لاہور کو بڑی تباہی سے بچا لیا

لاہور( اباسین خبر)سی ٹی ڈی کی کارروائی، لاہور کو بڑی تباہی سے بچا لیا۔سی ٹی ڈی پنجاب نے مختلف انٹیلی جنس بیسڈ آپریشنز کے دوران لاہور سے 2 فتنہ الخوارج سمیت پنجاب کے مختلف شہروں سے 20 دہشت گردوں کو گرفتار کیا۔ترجمان سی ٹی ڈی کے مطابق، دہشت گردی کے خدشات کے پیش نظر، 162 انٹیلی جنس بیسڈ آپریشنز کیے گئے، جن میں لاہور، فیصل آباد، خانیوال، بہاول نگر، راولپنڈی، چنیوٹ، میانوالی، ساہیوال، شیخوپورہ، سیالکوٹ، بہاولپور اور حافظ آباد شامل تھے۔ترجمان نے بتایا کہ کارروائیوں میں لاہور سے 2 فتنہ الخوارج جبکہ راولپنڈی سے دہشت گرد منموہن سنگھ کو گرفتار کیا گیا، جو رحیم یار خان کا رہائشی ہے۔دہشت گردوں سے دھماکہ خیز مواد، 3 آئی ای ڈی بم، 23 ڈیٹونیٹرز، 61 فٹ حفاظتی فیوز تار، متنازع پمفلٹس، نقدی اور موبائل فون برآمد ہوئے۔ دہشت گردوں کی شناخت صالح رضا، محمد ریاض، ابوبکر، بوال خان، محمد یونس، عثمان اور منموہن سنگھ کے نام سے ہوئی۔