چیمپئنز ٹرافی میں خراب کارکردگی ، کھلاڑیوں کیخلاف ایکشن شروع

لاہور( سپورٹس ڈیسک)چیمپئنز ٹرافی میں پاکستان ٹیم کی خراب کارکردگی کے بعد نیوزی لینڈ کے خلاف ٹی ٹوئنٹی سیریز کے لیے نوجوان کھلاڑیوں کو موقع دینے کا فیصلہ کیا گیا ہے۔ذرائع کے مطابق، ڈومیسٹک کرکٹ میں اچھی کارکردگی دکھانے والے کھلاڑیوں کو لاہور طلب کر لیا گیا ہے، جہاں نوجوان کرکٹرز کی بورڈ کے عہدیداران سے ملاقات متوقع ہے۔ یہ فیصلہ 2026 کے ٹی ٹوئنٹی ورلڈ کپ کی تیاری کے حوالے سے کیا گیا ہے، جس میں نوجوان کھلاڑیوں پر انحصار کرنے کا فیصلہ کیا گیا ہے۔پاکستان کرکٹ ٹیم 12 مارچ کو نیوزی لینڈ روانہ ہوگی، جہاں 16 مارچ سے پہلے مرحلے میں 5 ٹی ٹوئنٹی میچز کی سیریز شروع ہو گی۔یاد رہے کہ پاکستان ٹیم چیمپئنز ٹرافی میں ایک بھی میچ جیتے بغیر ایونٹ سے باہر ہو گئی تھی۔ بعد ازاں یہ خبریں بھی سامنے آئیں کہ دورہ نیوزی لینڈ کے لیے پاکستان کرکٹ ٹیم کے سینئر کھلاڑیوں نے “بریک” لینے کے لیے مشاورت شروع کر دی ہے۔ ذرائع کے مطابق، بعض کھلاڑیوں کو چیمپئنز ٹرافی کی ناقص کارکردگی کی بنیاد پر ڈراپ ہونے کا خدشہ ہے، جس کے باعث کچھ کھلاڑی دورہ نیوزی لینڈ سے دستبردار ہو سکتے ہیں۔