عمران خان کی اہلیہ سے ملاقات نہ کرانے پر سپرنٹنڈنٹ اڈیالہ جیل عدالت طلب

اسلام آباد( اباسین خبر)اسلام آباد ہائیکورٹ نے عدالتی احکامات کے باوجود بانی پی ٹی آئی عمران خان کی بشری بی بی سے ملاقات نہ کروانے پر توہین عدالت کے کیس میں سپرنٹنڈنٹ اڈیالہ جیل کو 4 مارچ کو ذاتی حیثیت میں طلب کرلیا۔قائم مقام چیف جسٹس اسلام آباد ہائیکورٹ جسٹس سردار سرفراز ڈوگر نے عمران خان کے وکیل فیصل چودھری کی درخواست پر تحریری حکمنامہ جاری کیا۔عدالتی حکم میں کہا گیا کہ سپرنٹنڈنٹ اڈیالہ جیل عدالت پیش ہو کر وضاحت کریں کہ عدالتی احکامات پر عمل کیوں نہیں کیا گیا، اور عمران خان کی بشری بی بی سے ملاقات نہ کروانا 28 جنوری کے عدالتی فیصلے کی خلاف ورزی ہے۔اسلام آباد ہائیکورٹ نے سپرنٹنڈنٹ اڈیالہ جیل کو ذاتی حیثیت میں پیش ہو کر جواب جمع کرانے کی ہدایت کرتے ہوئے کیس کی مزید سماعت 4 مارچ تک ملتوی کر دی۔واضح رہے کہ بانی پی ٹی آئی عمران خان نے بشری بی بی سے ملاقات نہ کرنے پر سپرنٹنڈنٹ اڈیالہ جیل کے خلاف ایڈووکیٹ فیصل فرید چودھری کے ذریعے عدالت سے رجوع کیا تھا۔