کراچی: مصطفیٰ عامر کے والدین کا سول سوسائٹی کے ہمراہ سی ویو کلاک ٹاور کے قریب احتجاج

کراچی ( اباسین خبر)مقتول نوجوان مصطفی عامر کے والدین نے سول سوسائٹی کے ہمراہ سی ویو کلاک ٹاور کے قریب احتجاج کیا۔ اس موقع پر مقتول کے رشتہ داروں اور اہلِ محلہ کی بڑی تعداد شریک ہوئی، اور گرفتار ملزمان ارمغان اور شیراز کے خلاف شدید نعرے بازی کی گئی۔ مظاہرین نے مقتول کی تصاویر والے پلے کارڈز اٹھا رکھے تھے، جن پر قاتلوں کے خلاف نعرے درج تھے۔مقتول مصطفی کی والدہ نے میڈیا سے بات کرتے ہوئے کہا کہ ارمغان اور شیراز میرے بیٹے کے قاتل ہیں، اور اس کیس کو منشیات سے جوڑنا بے بنیاد ہے۔ وہی قاتل ہیں جنہیں ہم نے پکڑوایا۔ میں اکیلی اپنے بیٹے کے لیے کھڑی رہی، اور کیس کو الجھانے کی کوشش نہ کی جائے۔ میرے بیٹے کو سفاکی سے قتل کیا گیا، اب ملزمان کو میرے حوالے کیا جائے تاکہ انہیں بھی اسی انجام تک پہنچایا جا سکے۔ سوال کیا کہ ادارے کہاں تھے جب ارمغان کو پولیس ریمانڈ پر نہیں دیا گیا؟مقتول کے والد نے کہا کہ احتجاج میں شریک ہر شخص دل سے آیا ہے اور وہ انصاف کے لیے یہاں موجود ہیں۔ ارمغان اور شیراز کو سخت سزا دی جائے، اور کیس کو روزانہ کی بنیاد پر سنا جائے تاکہ مجرموں کو جلد انصاف مل سکے۔ ہم دونوں ملزمان کو سزا دلوانے کے لیے آخری حد تک جائیں گے۔