پنجاب میں دیہی خواتین کیلئے اسپیشل بسیں چلانے کا فیصلہ

لاہور( اباسین خبر)پنجاب حکومت نے دیہی خواتین کے لیے ایک تاریخی قدم اٹھاتے ہوئے اسپیشل بس سروس شروع کرنے کا فیصلہ کیا ہے۔ اس منصوبے کے تحت ہر دیہی تحصیل سے ڈسٹرکٹ ہیڈکوارٹر تک بس سروس فراہم کی جائے گی، تاکہ دیہاتی خواتین کو نقل و حمل کی سہولت فراہم کی جا سکے۔ وزیراعلی مریم نواز شریف نے اس حوالے سے انٹر ویلج ٹرانسپورٹ پلان کی تیاری کی ہدایت دی ہے، اور دور دراز اضلاع میں 25 بسوں پر مشتمل ماس ٹرانزٹ سسٹم شروع کرنے کے لیے تجویز کا جائزہ بھی لیا جا رہا ہے۔وزیراعلی مریم نواز نے خواتین کی ٹرانسپورٹیشن کے لیے جامع پلان طلب کرتے ہوئے ماس ٹرانزٹ سسٹم میں خواتین مسافروں کے لیے سبسڈی دینے کے فوری اقدامات کی ہدایت کی ہے۔ اس منصوبے کے تحت پنجاب میں پہلا ویمن ٹرانسپورٹ سیلوشن پلان تیار کیا جائے گا، جس کا مقصد دیہاتی خواتین کے لیے آسان اور محفوظ ٹرانسپورٹ کی فراہمی ہے۔وزیراعلی کا کہنا تھا کہ دیہی خواتین کے لیے مناسب ٹرانسپورٹ سسٹم کی عدم موجودگی ایک سنگین مسئلہ ہے اور جدید ٹرانسپورٹ سسٹم کی فراہمی سے ان خواتین کا اعتماد بڑھے گا۔ اس کے علاوہ، طالبات اور مریض خواتین کو بھی آمد و رفت میں آسانی ہوگی، جو کہ ان کے لیے ایک اہم سہولت ہوگی۔ انہوں نے اس بات پر بھی افسوس کا اظہار کیا کہ دیہاتی خواتین کو پبلک ٹرانسپورٹ میں تکلیف دہ حالات میں سفر کرتے دیکھ کر انہیں شدید دکھ ہوتا ہے۔