خلیل الرحمٰن قمر نے مجھ سے بدتمیزی کی: ریشم

لاہور( شو بز ڈیسک)پاکستانی فلم اور ٹی وی کی معروف اداکارہ ریشم نے انکشاف کیا ہے کہ مشہور ڈرامہ نویس خلیل الرحمن قمر نے ان کے ساتھ بدتمیزی کی ہے۔ریشم، جو کئی دہائیوں سے انڈسٹری کا حصہ رہی ہیں، نے اس واقعے کے بعد خلیل الرحمن قمر کے کام پر بھی تنقید کی۔ انہوں نے کہا کہ “میں پہلے ان کے مداحوں میں شامل تھی، لیکن اب ان کی تحریریں مجھے متاثر کن نہیں لگتی۔”شو میں گفتگو کرتے ہوئے ریشم نے مزید کہا کہ خلیل الرحمن قمر اب بھارتی فلموں کی کاپی کر رہے ہیں اور ان کے مکالمے خود ان کے خلاف جا رہے ہیں۔ ان کے مطابق، ان کے قلم میں وہ طاقت نہیں رہی جو پہلے تھی۔ریشم نے بتایا کہ ایک پارٹی میں شریک ہونے کے دوران، جہاں ہمایوں سعید کی دعوت پر وہ موجود تھیں اور خلیل الرحمن قمر بھی وہاں تھے، انہوں نے تمام مہمانوں کی طرح خلیل الرحمن قمر کو بھی سلام کیا۔ تاہم، خلیل الرحمن قمر نے انتہائی غیر شائستہ رویہ اپنایا اور ان کے ساتھ بدتمیزی کی۔ ریشم نے کہا کہ وہ اس رویے پر حیران رہ گئیں اور خاموشی اختیار کر لی، کیونکہ وہ جانتی ہیں کہ ایسے لوگوں کے ساتھ کس طرح نمٹنا ہے۔