وزیراعظم نے شرح نمو میں پائیدار بہتری کیلیے صنعت کاروں سے تجاویز مانگ لیں

اسلام آباد( اباسین خبر) وزیراعظم محمد شہباز شریف نے ملک کی شرح نمو میں پائیدار بہتری کے لیے کاروباری شخصیات اور صنعت کاروں سے تجاویز مانگ لی ہیں۔ وزیراعظم نے اس سلسلے میں کاروباری شخصیات، صنعت کاروں اور حکومتی وزرا پر مشتمل کمیٹی تشکیل دینے کی ہدایت بھی کی، جو دو ہفتوں کے اندر حکومت کو پائیدار شرح نمو کے حصول کے حوالے سے تجاویز دے گی۔وزیراعظم سے ملک کے ممتاز صنعت کاروں اور کاروباری شخصیات کے وفد نے وزیراعظم ہاس میں ملاقات کی۔ گفتگو کے دوران وزیراعظم نے کہا کہ حکومت پاکستان ملک میں صنعت و کاروبار کے فروغ کے لیے ترجیحی بنیادوں پر کام کر رہی ہے اور کاروباری برادری کی فلاح و بہبود ہماری اولین ترجیح ہے۔وزیراعظم نے کہا کہ حکومت ملک میں کاروبار اور سرمایہ کار دوست پالیسیوں کی فراہمی کے حوالے سے کوشاں ہے اور خصوصی سرمایہ کاری سہولت کونسل کے ذریعے سرمایہ کاروں کو آسان اور سہل پلیٹ فارم فراہم کیا جا رہا ہے۔ انہوں نے مزید کہا کہ فیڈرل بورڈ آف ریونیو کی ڈیجیٹائزیشن اور فیس لیس کسٹم اسیسمنٹ سسٹم کے ذریعے شفافیت کو فروغ دیا گیا ہے۔وزیراعظم نے کہا کہ حکومت کی معاشی ٹیم کی محنت سے ملک کے میکرو اکنامک حالات میں بہتری آئی ہے، تاہم مائیکرو اکنامک سطح پر مزید محنت کی ضرورت ہے تاکہ عوام تک معاشی بہتری کے فوائد پہنچ سکیں۔انہوں نے کہا کہ براہ راست بیرونی سرمایہ کاری کے حوالے سے حکومت نے اہم اقدامات کیے ہیں اور آذربائیجان و ازبکستان کے دوروں کے دوران کئی سرمایہ کاری معاہدوں پر دستخط ہوئے ہیں جو بیرونی سرمایہ کاروں کا پاکستان کی معیشت میں اعتماد کا مظہر ہیں۔ وزیراعظم نے کہا کہ ملک کی شرح نمو کو برآمدات کے ذریعے بڑھانا ہی بہترین راستہ ہے۔وفدنے حکومتی معاشی پالیسیوں اور معاشی اشاریوں میں بہتری کی تعریف کی اور فیڈرل بورڈ آف ریونیو اور دیگر حکومتی اداروں کی اسمگلنگ کی روک تھام کے حوالے سے کیے گئے مثر اقدامات کو سراہا۔ شرکا نے کسٹم اسیسمنٹ سسٹم کے نظام کو متعارف کروانے پر حکومت کی تعریف کی اور حکومتی پرائیویٹائزیشن اور ڈی ریگولیشن پالیسی کو بھی سراہا۔