ہڑپہ تہذیب سے متعلق ایک معمے کو حل کرنے کیلیے لاکھوں ڈالر کی پیشکش

کراچی ( مانیٹرنگ ڈیسک)ہڑپہ تہذیب کے قدیم اسکرپٹ کو حل کرنے کے لیے 10 لاکھ ڈالر کی پیش کش کی گئی ہے، جو کہ ایک دلچسپ پیش رفت ہے۔ وادی سندھ کی تہذیب کے اس قدیم اسکرپٹ کو 5300 سے 3300 سال قبل کے دوران جنوبی ایشیا کے شمال مغربی حصوں میں آباد افراد نے استعمال کیا تھا، جس میں پاکستان، شمال مغربی بھارت اور شمال مشرقی افغانستان شامل ہیں۔ یہ اسکرپٹ ابھی تک کسی بھی محقق کے ذریعے مکمل طور پر نہیں سمجھا جا سکا ہے، حالانکہ اس سے متعلق کئی تحقیقات جاری ہیں۔یونیورسٹی آف واشنگٹن کے کمپیوٹر سائنس دان پروفیسر راجیش پی این را نے بتایا کہ انہیں متعدد افراد کی ای میلز موصول ہوئیں، جنہوں نے دعوی کیا کہ انہوں نے اس اسکرپٹ کو حل کر لیا ہے، تاہم ان کے جوابات میں اسکرپٹ سے متعلق اہم حقائق نظر انداز کر دیے گئے تھے۔بھارتی ریاست تمل نادو کے وزیر اعلی ایم کے اسٹالن نے اس اسکرپٹ کو حل کرنے والے کے لیے 10 لاکھ ڈالر کا انعام پیش کیا ہے۔ یہ اعلان ایک نئی تحقیق کے بعد سامنے آیا ہے، جس میں بتایا گیا کہ اس اسکرپٹ میں پائے جانے والے نشانات اور قدیم تامل شاعری میں مماثلت پائی گئی ہے، جو ممکنہ طور پر اس قدیم زبان کو سمجھنے کے لیے ایک اہم سراغ ہو سکتی ہے۔