نسک پلیٹ فارم پر مسجد نبویؐ ریاض الجنہ کے پرمٹ کے لئے نیا آپشن متعارف

ریاض( مانیٹرنگ ڈیسک)سعودی وزارت حج و عمرہ نے زائرین کی سہولت کے لیے نسک پلیٹ فارم پر مسجد نبوی ریاض الجنہ پرمٹ حاصل کرنے کے لیے ایک نیا آپشن متعارف کرا دیا ہے۔مقامی میڈیا کے مطابق، اگر زائرین کو زیارت کے لیے اپائنٹمنٹ نہیں ملتی تو وہ اب ویٹ لسٹ آپشن کا انتخاب کر سکتے ہیں۔ وزارت حج و عمرہ نے اعلان کیا ہے کہ مسجد نبوی کی حدود میں موجود زائرین جو نسک یا توکلنا پلیٹ فارم کے ذریعے ریاض الجنہ کے لیے پرمٹ حاصل کرنا چاہتے ہیں، ان کے لیے یہ نیا آپشن دستیاب ہے۔قبل ازیں نسک پلیٹ فارم کے ذریعے فوری پرمٹ حاصل کرنے کی سہولت فراہم کی گئی تھی، تاہم اب اس میں ویٹنگ آپشن کا اضافہ کیا گیا ہے۔ اس کا مطلب یہ ہے کہ اگر کوئی زائر ویٹنگ لسٹ میں شامل ہوتا ہے تو جیسے ہی سلاٹ دستیاب ہوگا، سسٹم خودبخود اسے پرمٹ جاری کر دے گا۔اس سے قبل نسک پلیٹ فارم پر فوری اپائنٹمنٹ کا فیچر بھی شامل کیا گیا تھا، جو زائرین کو سال بھر روضہ شریفہ کی زیارت کی اجازت دیتا ہے جب تک وہ مسجد نبوی کے قریب اور اس کی حدود میں ہوں۔مسجد نبوی کے قرب و جوار میں موجود افراد جتنی بار چاہیں، 20 منٹ کے لیے زیارت کے لیے نسک یا توکلنا ایپ سے اپائنٹمنٹ حاصل کرسکتے ہیں۔