پی ٹی آئی والے غیرملکی سازشیں بند کر کے مذاکرات کی میز پر آئیں، شرجیل میمن

کراچی ( اباسین خبر)سندھ کے سینئر وزیر شرجیل انعام میمن نے کہا ہے کہ پاکستان تحریک انصاف (پی ٹی آئی) والوں کو غیرملکی سازشیں بند کرکے مذاکرات کی میز پر آنا چاہیے۔کراچی میں پریس کانفرنس کے دوران شرجیل میمن نے پی ٹی آئی کے اندر سنجیدہ تضاد کا ذکر کرتے ہوئے کہا کہ وہ چاہتے ہیں کہ پی ٹی آئی ملک کے خلاف غیرملکی سازشوں کو ترک کرے اور مذاکرات کے لیے آئیں۔انہوں نے مزید کہا کہ اگر باقی صوبوں میں زیادہ کام ہو رہا ہے تو لوگ سندھ کیوں آرہے ہیں؟ سندھ حکومت کے 180 ارب روپے سپریم کورٹ میں پھنسے ہوئے ہیں اور سیس ٹیکس حکومت سندھ کو ملنا چاہیے۔ تجاوزات کے خلاف ایکشن پر پولیس پر حملے ہوتے ہیں اور عوام کے ردعمل کے مطابق فیصلے کیے جاتے ہیں۔شرجیل میمن نے وفاقی حکومتوں پر بھی تنقید کرتے ہوئے کہا کہ وفاقی حکومتوں نے پنجاب کی جماعتوں کی رہنمائی میں موٹر ویز پر توجہ دی، لیکن سندھ اور دیگر صوبوں کے ساتھ وفاقی منصوبوں میں زیادتی کی گئی۔ انہوں نے تھر کول منصوبے کا ذکر کرتے ہوئے بتایا کہ پیپلز پارٹی کی حکومت سندھ نے اس منصوبے کا آغاز کیا تھا، لیکن پی ایم ایل این کی حکومت نے اسے ختم کر دیا تھا، جس کے بعد 2008 میں آصف علی زرداری کی حکومت آنے پر یہ منصوبہ دوبارہ شروع کیا گیا۔سندھ میں سولر منصوبے کے تحت لاکھوں لوگوں کو سولر سہولتیں فراہم کی جا رہی ہیں، اور بلاول بھٹو کے ویژن کے تحت 21 لاکھ بے گھر افراد کے لیے گھر بنائے جا رہے ہیں۔ صحت کے شعبے میں سندھ سب سے آگے ہے اور این آئی سی وی ڈی، این آئی سی ایچ، اور سائبر نائف جیسے ماڈلز کہیں اور نہیں ہیں۔یونیورسٹیز کے حوالے سے شرجیل میمن نے کہا کہ سندھ کابینہ نے یونیورسٹیوں میں وی سی کے کرائیٹیریا کو بڑھایا ہے اور اب سندھ میں 30 یونیورسٹیز ہیں۔ انہوں نے مزید کہا کہ وی سی کی تعیناتی کے لیے عمر کی حد 62 سال اور متعلقہ فیلڈ میں پی ایچ ڈی کی شرط رکھی گئی ہے۔