پی ٹی آئی کا احتجاج روکنے کیلئے تاجروں کا اسلام آباد ہائیکورٹ سے رجوع

اسلام آباد( اباسین خبر)پاکستان تحریک انصاف (پی ٹی آئی) کے احتجاج کو روکنے اور غیرقانونی قرار دینے کے لیے تاجروں نے اسلام آباد ہائیکورٹ سے رجوع کر لیا۔جناح سپر مارکیٹ کے صدر نے پی ٹی آئی کے احتجاج کو روکنے اور غیرقانونی قرار دینے کے لیے اسلام آباد ہائیکورٹ میں درخواست دائر کی۔ درخواست میں وزارت داخلہ، چیف کمشنر، آئی جی اسلام آباد اور چیئرمین پی ٹی آئی بیرسٹر گوہر کو فریق بنایا گیا ہے۔درخواست میں مقف اختیار کیا گیا ہے کہ پی ٹی آئی کا احتجاج بنیادی انسانی حقوق کی خلاف ورزی ہے۔ پرامن کاروبار کرنا اور دیگر فرائض کی ادائیگی ہر شہری کا بنیادی حق ہے، اور پی ٹی آئی کے احتجاج سے شہریوں کے بنیادی حقوق متاثر ہو سکتے ہیں۔درخواست میں عدالت سے استدعا کی گئی کہ انتظامیہ کو ہدایت کی جائے کہ چیئرمین پی ٹی آئی اور ان کے کارکنان کو اس غیرقانونی احتجاج سے روکا جائے۔تاجروں کی جانب سے استدعا کی گئی ہے کہ احتجاج کے پیش نظر نقل و حرکت، تجارت اور املاک کو تحفظ فراہم کیا جائے، اور احتجاج کی کال کو آزادی تجارت اور بنیادی انسانی حقوق کی خلاف ورزی قرار دیا جائے۔ عدالت سے یہ بھی کہا گیا کہ وہ غیرقانونی احتجاج کو روکنے اور امن یقینی بنانے کی ہدایت دے۔