لوگ مجھے ٹرول کرکے اپنے ویوز بڑھاتے ہیں،شہناز گل

ممبئی( شو بز ڈیسک)بھارتی اداکارہ اور گلوکارہ شہناز گل نے اپنے خلاف ہونے والی سماجی رابطوں کی ویب سائٹس پر تنقید اور خبروں کے حوالے سے دلچسپ انداز میں اظہارِ خیال کیا ہے۔شہناز گل کا کہنا ہے کہ لوگ انہیں تنقید کا نشانہ اس لیے بناتے ہیں کیونکہ انہیں اپنی ویڈیوز اور مواد کے لیے زیادہ ناظرین درکار ہوتے ہیں۔ ان کے مطابق بعض اوقات توجہ حاصل کرنے کے لیے ان کے بارے میں چونکا دینے والی یا منفی سرخیاں بھی بنائی جاتی ہیں۔اداکارہ نے مزاحیہ انداز میں کہا کہ اگر گفتگو کے دوران ان کی کوئی بات خبر کی سرخی بن جائے تو وہ یہی سوچتی ہیں کہ شاید ان کے ذریعے متعلقہ افراد کو کچھ اضافی ناظرین حاصل ہوگئے ہوں۔ ان کے بقول اگر ان کی کسی بات سے کسی کو فائدہ پہنچ جائے تو وہ اسے بھی مثبت بات سمجھتی ہیں۔حال ہی میں پنجابی فلم سنگھ ورسز کور 2 میں دکھائی دینے والی شہناز گل نے اپنے بے ساختہ مزاحیہ انداز کے بارے میں کہا کہ ان کے اندر پنجابیت موجود ہے، اسی لیے وہ باقاعدہ مزاح کرنے کی کوشش نہیں کرتیں بلکہ ان کی فطری گفتگو ہی لوگوں کو مزاحیہ محسوس ہوتی ہے۔ان کا کہنا تھا کہ مداحوں کو ان کا یہ انداز اس لیے پسند ہے کیونکہ وہ اسے جان بوجھ کر اختیار نہیں کرتیں بلکہ یہ ان کی شخصیت کا قدرتی حصہ ہے۔شہناز گل نے مزید کہا کہ انہوں نے کبھی کسی دوسرے شخص کو اپنے اوپر حاوی ہونے کی اجازت نہیں دی۔ انہیں کسی نے یہ نہیں سکھایا کہ ذرائع ابلاغ کے سامنے کس انداز میں بات کرنی، چلنا یا برتاؤ کرنا چاہیے۔اداکارہ کے مطابق انہیں وقتاً فوقتاً مختلف باتیں سننے کو ملیں، تاہم وہ سمجھتی ہیں کہ انسان کو اپنی حقیقی شخصیت کے ساتھ رہنا چاہیے اور دوسروں کی توقعات کے مطابق خود کو تبدیل نہیں کرنا چاہیے۔