انگلینڈ کے خلاف پاکستان کا ٹاپ آرڈر ناکام، مشکلات بڑھ گئیں

راولپنڈی (سپورٹس ڈیسک) پاکستان، سری لنکا اور انگلینڈ کے درمیان جاری سہ ملکی ون ڈے سیریز کے دوسرے میچ میں پاکستان کا ابتدائی بیٹنگ آرڈر ناکام ہوگیا۔ راولپنڈی میں کھیلے جانے والے میچ میں انگلینڈ نے ٹاس جیت کر پہلے بولنگ کرنے کا فیصلہ کیا۔پاکستان کو اننگز کی پہلی ہی گیند پر نقصان اٹھانا پڑا، جب فخر زمان گس ایٹکنسن کی گیند پر جو روٹ کو کیچ دے بیٹھے۔ اس کے بعد صائم ایوب بھی زیادہ دیر وکٹ پر نہ ٹھہر سکے اور 8 رنز بنا کر سونی بیکر کی گیند پر آؤٹ ہوگئے۔ اس وقت پاکستان کا مجموعی اسکور 31 رنز تھا۔قومی ٹیم کو تیسرا نقصان بابر اعظم کی صورت میں اٹھانا پڑا، جو 34 رنز بنا کر ول جیکس کی گیند پر بولڈ ہوگئے۔ ان کی وکٹ گرنے پر پاکستان کا مجموعی اسکور 59 رنز تھا۔میچ کے لیے پاکستان کی ٹیم میں فخر زمان، صائم ایوب، بابر اعظم، سعد بیگ، حسن نواز، سلمان علی آغا، عرفات منہاس، فہیم اشرف، شاہین آفریدی، نسیم شاہ اور حارث رؤف شامل ہیں۔واضح رہے کہ پاکستان نے سہ ملکی سیریز کے پہلے میچ میں سری لنکا کو 37 رنز سے شکست دے کر فاتحانہ آغاز کیا تھا۔ اب دوسرے میچ میں انگلینڈ کے خلاف قومی ٹیم کو مضبوط پوزیشن حاصل کرنے کے لیے بہتر بیٹنگ کی ضرورت ہے۔