پاکستان کے زرمبادلہ ذخائر میں اضافہ، مجموعی حجم 21 ارب ڈالر سے تجاوز

کراچی( کامرس ڈیسک) سٹیٹ بینک آف پاکستان کے زرمبادلہ ذخائر میں ایک ہفتے کے دوران اضافہ ریکارڈ کیا گیا ہے۔مرکزی بینک کے جاری کردہ اعداد و شمار کے مطابق اسٹیٹ بینک کے ذخائر میں 2 کروڑ 30 لاکھ ڈالر کا اضافہ ہوا ہے، جس کے بعد ذخائر بڑھ کر 15 ارب 85 کروڑ 7 لاکھ ڈالر تک پہنچ گئے ہیں۔رپورٹ کے مطابق کمرشل بینکوں کے زرمبادلہ ذخائر میں بھی 17 لاکھ ڈالر کا اضافہ ہوا ہے، جس کے بعد ان کے ذخائر 5 ارب 44 کروڑ 28 لاکھ ڈالر ہو گئے ہیں۔اسٹیٹ بینک کے مطابق مجموعی طور پر ملک کے زرمبادلہ ذخائر میں 2 کروڑ 45 لاکھ ڈالر کا اضافہ ریکارڈ کیا گیا ہے، جس کے بعد پاکستان کے کل ذخائر 21 ارب 29 کروڑ 35 لاکھ ڈالر کی سطح پر پہنچ گئے ہیں۔