پُرعزم ہوں، اپنی غلطیوں پر قابو پانے کی کوشش کروں گا: بابر اعظم

پُرعزم ہوں، اپنی غلطیوں پر قابو پانے کی کوشش کروں گا: بابر اعظم

Nov 21, 2026|ویب ڈیسک

لاہور (سپورٹس ڈیسک): قومی ٹیسٹ کرکٹ ٹیم کے کپتان بابر اعظم نے کہا ہے کہ وہ اپنی بیٹنگ فارم کے حوالے سے پُرعزم ہیں اور اپنی غلطیوں پر قابو پانے کی بھرپور کوشش کریں گے، شائقین کو جلد رنز بنتے ہوئے دکھائی دیں گے۔پی سی بی پوڈ کاسٹ میں گفتگو کرتے ہوئے بابر اعظم نے کہا کہ ٹیسٹ سیریز کی کنڈیشنز زیادہ مشکل نہیں تھیں اور وہ ڈومیسٹک کرکٹ میں بھی ایسی پچز پر کھیل چکے ہیں، تاہم بطور ٹیم ہر طرح کے حالات کا مقابلہ کرنے کے لیے تیار رہنا ضروری ہوتا ہے۔بطور کپتان ٹیم کی مجموعی کارکردگی پر اطمینان کا اظہار کرتے ہوئے انہوں نے کہا کہ نئے کھلاڑیوں کا ٹیم کے لیے بہترین کھیل پیش کرنا انتہائی خوش آئند ہے۔ انہوں نے بولرز کی تعریف کرتے ہوئے کہا کہ ثاقب خان نے انتہائی نظم و ضبط کے ساتھ گیند بازی کی کیونکہ تسلسل سے اچھی بولنگ کرنے والے کھلاڑی کپتان کے لیے آسانیاں پیدا کرتے ہیں، جبکہ نوجوان فاسٹ بولرز کو تجربہ کار محمد عباس کی مہارت سے سیکھنے کی ضرورت ہے۔نوجوان بلے بازوں کے حوالے سے بات کرتے ہوئے قومی کپتان نے کہا کہ بین الاقوامی کرکٹ میں حریف ٹیمیں نئے بیٹرز کو سخت چیلنج دیتی ہیں، تاہم طیب عارف اور محمد طحہٰ منفرد صلاحیتوں کے مالک ہیں اور قومی بیٹنگ لائن کا روشن مستقبل ہیں۔ واضح رہے کہ بابر اعظم کی قیادت میں پاکستان نے سری لنکا کو دو ٹیسٹ میچوں کی سیریز میں ایک صفر سے شکست دی ہے۔