کفایت شعاری مہم: دکانوں اور کاروباری مراکز کے نئے اوقات مقرر

 اسلام آباد( اباسین خبر)وفاقی حکومت نے توانائی کے مؤثر استعمال اور کفایت شعاری مہم کے تحت کاروباری مراکز کے نئے اوقاتِ کار نافذ کر دیے ہیں، جس کا باقاعدہ اعلامیہ بھی جاری کر دیا گیا ہے۔اعلامیے کے مطابق اسلام آباد میں دکانیں، بازار، خریداری مراکز اور کریانہ اسٹور رات 9 بجے تک کھلے رہ سکیں گے، جبکہ شادی ہال، تقریباتی مقامات اور دیگر تجارتی سرگرمیوں کو رات 10 بجے تک جاری رکھنے کی اجازت ہوگی۔مزید برآں کھانے پینے کے مراکز، ہوٹل، ضیافت کے انتظامات فراہم کرنے والے ادارے، سبزی اور پھل فروش رات 11 بجے تک کاروبار کر سکیں گے۔ تاہم گھر تک اشیا یا کھانے پہنچانے کی سہولت ان اوقات کی پابندی سے مستثنیٰ ہوگی۔اعلامیے میں اسپتالوں، طبی مراکز، ادویات کی دکانوں، بیکریوں، تندوروں اور دودھ و دہی فروخت کرنے والی دکانوں کو ان پابندیوں سے استثنا دیا گیا ہے۔