زرعی شعبے میں مسلسل جدت اور ترقی معاشی استحکام کے لیے ناگزیر ہے ، رانا تنویر حسین

اسلام آباد (اپنے رپورٹر سے)وفاقی وزیر برائے نیشنل فوڈ سکیورٹی اینڈ ریسرچ رانا تنویر حسین نے کہا ہے کہ زرعی شعبے میں مسلسل جدت اور ترقی پاکستان کے معاشی استحکام کیلئے ناگزیر ہے۔ وہ منگل کوپاکستان میں فوڈ اینڈ ایگریکلچر آرگنائزیشن کی نمائندہ فلورنس رولے سے ملاقات میں گفتگو کررہے تھے ۔ملاقات میں فوڈ سکیورٹی اور زرعی ترقی سے متعلق امور بھی زیر غور آئے۔وفاقی وزیر نے کہا کہ زراعت کی ترقی پاکستان کو درپیش بہت سے معاشی مسائل کا حل ہے،زراعت ملک میں خوشحالی، غذائی تحفظ اور سماجی و اقتصادی ترقی کے لیے کلیدی اہمیت رکھتی ہے،زرعی شعبے میں مسلسل جدت اور ترقی پاکستان کے معاشی استحکام کے لیے ناگزیر ہے۔ انہوں نے کہاکہ پاکستان میں فوڈ اینڈ ایگریکلچرل آرگنائزیشن کا کردار بہت حوصلہ افزا ہے، زراعت کی ترقی حکومت کی اولین ترجیح ہے، حکومت نے کسانوں کی سہولت کے لیے متعدد پروگرام شروع کیے ہیں، جدید فصلوں کی پیداوار کے حوالے سے کسانوں کی استعداد کار بڑھانے کیلئے ان کی رہنمائی کی ضرورت ہے۔ رانا تنویر حسین نے کہا کہ ایف اے او زراعت کی ترقی اور پیداوار پر موسمیاتی تبدیلی کے اثرات کو کم کرنے کے لیے رہنمائی مہیا کر سکتا ہے۔ اس موقع پر گفتگو کرتے ہوئے فوڈ اینڈ ایگریکلچرل آرگنائزیشن کی نمائندہ فلورنس رولے نے کہاکہ فوڈ اینڈ ایگریکلچرل آرگنائزیشن پاکستان میں زرعی شعبے کو آگے بڑھانے کے لیے اپنا تعاون جاری رکھے گی، پاکستان میں کسانوں اور محققین کی صلاحیت بڑھانے پر مل کر کام کر رہے ہیں۔ انہوں نے کہاکہ زرعی شعبے میں موسمیاتی تبدیلی کے اثرات کو کم کرنے کیلئے دیگر سٹیک ہولڈرز کے ساتھ مل کربھی کام کر رہے ہیں۔