وساکھی میلہ اور خالصہ جنم دن پر سات ہزار سکھ یاتری پاکستان آئیں گے

لاہور( اباسین خبر)سکھوں کے مذہبی تہوار وساکھی میلہ اور خالصہ جنم دن کے موقع پر اس سال بھارت سے پاکستان آنے والے سکھ یاتریوں کی تعداد سات ہزار سے تجاوز کرنے کی توقع ہے۔ 10 اپریل کو بھارت سمیت دنیا بھر سے سکھ یاتری پاکستان پہنچیں گے، جن میں سے تین ہزار یاتری پاک انڈیا مذہبی سیاحتی معاہدے کے تحت آ سکیں گے، تاہم اس سال سات ہزار بھارتی یاتری پاکستان آنے کے خواہشمند ہیں۔متروکہ وقف املاک بورڈ کے حکام کے مطابق، پاکستان ہائی کمیشن نیودہلی سے درخواست کی گئی ہے کہ زیادہ سے زیادہ سکھ یاتریوں کو ویزے جاری کیے جائیں۔ ایڈیشنل سیکرٹری شرائنز سیف اللہ کھوکھر نے کہا کہ پاکستان سکھوں کا دوسرا گھر ہے، اور ہر آنے والے مہمان کو خوش آمدید کہا جائے گا۔پاکستان کی حکومت اور متروکہ وقف املاک بورڈ کی کوششوں سے مذہبی سیاحت کو فروغ ملا ہے۔ سیکیورٹی کے سخت انتظامات کیے گئے ہیں اور مختلف اداروں کو ضروری ہدایات دی گئی ہیں۔بھارتی سکھ یاتری 10 اپریل کو واہگہ بارڈر کے راستے پاکستان آئیں گے اور انہیں 10 سے 19 اپریل تک ویزا جاری کیا جائے گا۔ وساکھی کی مرکزی تقریب 14 اپریل کو گوردوارہ پنجہ صاحب حسن ابدال میں منعقد ہوگی۔ یاتری گوردوارہ جنم استھان ننکانہ صاحب، گوردوارہ دربار صاحب کرتارپور اور دیگر مقدس مقامات کی یاترا بھی کریں گے۔ بھارت کے علاوہ امریکا، کینیڈا، آسٹریلیا اور برطانیہ سمیت دیگر ممالک سے بھی سکھ یاتری پاکستان پہنچیں گے۔