الیکشن کمیشن کا بڑا اقدام، 24 سابق ارکان کو نااہل قرار دے دیا

اسلام آباد( اباسین خبر)الیکشن کمیشن نے 24 سابق ارکان قومی و صوبائی اسمبلی کو نااہل قرار دے دیا ہے۔ یہ فیصلہ مالی سال 2022-23 کے اثاثوں اور گوشواروں کی تفصیلات جمع نہ کرانے پر کیا گیا۔ قومی اسمبلی کے 10 سابق ارکان، سندھ اسمبلی کے 7 اور بلوچستان اسمبلی کے 7 سابق ارکان اس فیصلے کا شکار ہوئے ہیں۔الیکشن کمیشن کا کہنا ہے کہ یہ ارکان اثاثوں کی تفصیلات جمع کرانے تک عام انتخابات، ضمنی انتخابات یا سینیٹ کے انتخابات میں حصہ نہیں لے سکیں گے۔ سابق ارکان کو مالی سال 2022-23 کے اثاثوں کی تفصیلات کے فارم بی جمع کرانے تک نااہلی کا سامنا رہے گا۔نااہل قرار دیے جانے والوں میں قومی اسمبلی کے سابق ارکان خرم دستگیر خان، محسن نواز رانجھا، محمد عادل، رانا محمد اسحاق خان، کمال الدین، عصمت اللہ، ثمینہ مطلوب، نصیبہ شمیم آرا پنور اور روبینہ عرفان شامل ہیں۔سندھ اسمبلی کے سابق ارکان عدیل احمد، حزب اللہ بھگیو، ارسلان تاج حسین، عارف مصطفی جتوئی، عمران علی شاہ، علی غلام اور طاہرہ بھی نااہل قرار دیے گئے ہیں۔ اسی طرح بلوچستان اسمبلی کے سابق ارکان میر سکندر علی، میر محمد اکبر، سردار یار محمد رند، عبدالرشید عبدالواحد صدیقی، میر حمال اور بی بی شاہینہ کو بھی نااہل قرار دیا گیا ہے۔