امریکا کا پاکستانی مصنوعات پر 29 فیصد ٹیرف، حکومت کی مذاکراتی حکمت عملی تیار

اسلام آباد( اباسین خبر)امریکا کی جانب سے پاکستانی مصنوعات پر 29 فیصد اضافی ٹیرف عائد کرنے کے فیصلے پر پاکستان نے ٹرمپ انتظامیہ سے مذاکرات کی حکمت عملی تیار کرنا شروع کر دی ہے۔ ایکسپریس نیوز کے مطابق وزیر تجارت جام کمال خان کی زیرصدارت وزارت تجارت میں اہم اجلاس منعقد ہوا جس میں امریکا کے نئے ٹیرف کے اثرات پر تفصیل سے غور کیا گیا۔اجلاس میں پچاس سے زائد کاروباری نمائندے، تاجروں اور برآمد کنندگان نے شرکت کی۔ حکومت کا مقصد اضافی ٹیرف میں کمی کے لیے امریکا سے بات چیت کرنا ہے، خصوصا پاکستانی ٹیکسٹائل برآمدات پر اس کے منفی اثرات کو روکنا۔پاکستان کی امریکا کو برآمدات کا حجم پانچ اعشاریہ پانچ ارب ڈالر سے زائد ہے، جس میں بیشتر برآمدات ٹیکسٹائل مصنوعات پر مبنی ہیں۔ وزیر اعظم شہباز شریف نے اس معاملے پر ایک ورکنگ گروپ قائم کیا ہے جس کی سربراہی وزیر خزانہ محمد اورنگزیب کر رہے ہیں۔