ٹرمپ کے ٹیرف نفاذ کے بعد عالمی اسٹاک مارکیٹس میں شدید گراوٹ

وا شنگٹن ( کامرس ڈیسک)امریکی صدر ڈونلڈ ٹرمپ کی جانب سے ٹیرف کے نفاذ کے بعد دنیا بھر کی اسٹاک مارکیٹس میں تیزی سے گراوٹ دیکھنے کو ملی ہے، جس کے اثرات پاکستان سمیت دیگر ممالک کی مارکیٹس پر بھی واضح طور پر نظر آئے۔بھارتی اسٹاک ایکسچینج کے دونوں انڈیکس سینسیکس اور نفٹی کھلتے ہی گر گئے، اور بی ایس ای سینسیکس میں 3 ہزار سے زائد پوائنٹس کی کمی آئی۔ غیر ملکی میڈیا کے مطابق ہانگ کانگ کا ہینگ سینگ انڈیکس سب سے زیادہ متاثر ہوا، جہاں شیئرز کی قیمتیں 13.22 فیصد تک گر گئیں۔جاپان کی نکی انڈیکس میں بھی 7 فیصد سے زائد کی کمی ہوئی، جس کے نتیجے میں ٹریڈنگ روکنی پڑی، جب کہ شنگھائی اسٹاک میں 7.34 فیصد کی گراوٹ دیکھی گئی۔ جرمنی کا ڈیکس انڈیکس 6.15 فیصد اور فٹیسی 4.55 فیصد تک گر گیا۔علاوہ ازیں خام تیل کی قیمتوں میں بھی 4 فیصد تک کمی آئی، جس کے نتیجے میں ڈبلیو ٹی آئی 59.34 ڈالرز اور برینٹ 63 ڈالرز فی بیرل کی سطح پر آ گیا۔