اسرائیلی بمباری، صحافی سمیت 2 افراد شہید، صحافیوں کی شہادتوں کی تعداد210 سے تجاوز کر گئی

غزہ ( مانیٹرنگ ڈیسک)غزہ میں اسرائیلی جارحیت کا سلسلہ تاحال جاری ہے، جس کے نتیجے میں خان یونس کے النصر اسپتال کے قریب صحافیوں کے خیموں پر بمباری کی گئی۔ بمباری کے نتیجے میں خیموں میں آگ بھڑک اٹھی، جس کے باعث 1 صحافی سمیت 2 افراد زندہ جل گئے، جبکہ 7 افراد شدید جھلس گئے۔فلسطینی حکام کے مطابق شہید ہونے والے صحافی حلمی الفقاوی کی شہادت کے بعد اکتوبر 2023 سے اب تک غزہ میں جاں بحق ہونے والے صحافیوں کی تعداد 210 ہو گئی ہے۔عرب میڈیا کے مطابق یہ حملہ النصر اسپتال کے قریب کیا گیا جہاں بے گھر افراد خیموں میں پناہ لیے ہوئے تھے۔ اس بمباری میں متعدد فلسطینی شہری بھی شہید اور زخمی ہوئے، جن میں صحافی بھی شامل تھے جو جنگ زدہ علاقے کی رپورٹنگ کر رہے تھے۔واٹسن انسٹی ٹیوٹ فار انٹرنیشنل اینڈ پبلک افیئرز کی ایک حالیہ رپورٹ کے مطابق، غزہ پر اسرائیلی حملہ اب تک میڈیا ورکرز کے لیے سب سے مہلک ثابت ہوا ہے۔ رپورٹ کے مطابق، اسرائیلی فورسز نے 7 اکتوبر 2023 سے اب تک 232 صحافیوں کو قتل کیا ہے، جو دونوں عالمی جنگوں، ویتنام کی جنگ، یوگوسلاویہ کی جنگوں اور افغانستان کی امریکی جنگوں کے مقابلے میں زیادہ ہیں۔