اسلام آباد( کامرس ڈیسک)پاکستان کی حکومت نے عالمی مالیاتی فنڈ (آئی ایم ایف) کے وفد کے دورے کی مصروفیات کو عوامی طور پر ظاہر نہ کرنے کا فیصلہ کیا ہے۔ وزارت خزانہ کے ذرائع کے مطابق، آئی ایم ایف وفد کا کوئی تحریری شیڈول جاری نہیں کیا جائے گا، اور وفد کی ملاقاتوں کی معلومات صرف متعلقہ محکموں کو فون کے ذریعے فراہم کی جائیں گی۔آئی ایم ایف کا وفد گزشتہ روز پاکستان پہنچا تھا، اور اس کا مقصد گڈ گورننس اور کرپشن کے تخلیصی جائزے کے لیے پاکستانی حکام سے بات چیت کرنا ہے۔ ذرائع کا کہنا ہے کہ آئی ایم ایف وفد سال 2025-26 کے بجٹ کی تجاویز کا جائزہ لے گا اور گورننس سے متعلق تکنیکی معاونت کے بارے میں پاکستانی حکام سے فالو اپ مذاکرات کرے گا۔وزارت خزانہ کے مطابق، آئی ایم ایف وفد آئندہ مالی سال کے لیے ٹیکس ریونیو اقدامات اور اخراجات پر کنٹرول سے متعلق پاکستانی حکام سے مذاکرات کرے گا اور بجٹ کو حتمی شکل دینے کے لیے وزارت خزانہ کے حکام کے ساتھ تجاویز تیار کرے گا۔یہ دورہ پاکستان کی مالیاتی پالیسیوں اور آئی ایم ایف کے ساتھ جاری مذاکرات کے تناظر میں بہت اہم سمجھا جا رہا ہے۔
حکومت کا آئی ایم ایف وفد کی مصروفیات کو منظر عام پر نہ لانے کا فیصلہ
5
