اسلام آباد( کامرس ڈیسک)پاکستان میں عالمی مالیاتی فنڈ (آئی ایم ایف) کا مشن 30 محکموں کے ساتھ مذاکرات کرنے کے لیے پاکستان پہنچ چکا ہے۔ ذرائع وزارت خزانہ کے مطابق، آئی ایم ایف نے گزشتہ دو ماہ میں پاکستان میں گورننس کی بہتری اور کرپشن کے خاتمے کے لیے دوسرا مشن بھیجا ہے۔آئی ایم ایف کا مشن گورننس اور بدعنوانی کے تشخیصی جائزے کی تیاری کے لیے ابتدائی کام مکمل کرے گا۔ اس مشن کا مقصد چھ بنیادی ریاستی افعال میں گورننس اور بدعنوانی کے خطرات کا ابتدائی جائزہ لینا ہے، جس میں مالیاتی شعبے کی نگرانی، مارکیٹ ضوابط، قانون کی حکمرانی، اور اینٹی منی لانڈرنگ اقدامات شامل ہیں۔ذرائع کا کہنا ہے کہ آئی ایم ایف مشن وزارت خزانہ، سٹیٹ بینک، ایف بی آر، منصوبہ بندی کمیشن، نجکاری کمیشن، آڈیٹر جنرل، نیب، ایف آئی اے، اوگرا اور دیگر حکام کے ساتھ مذاکرات کرے گا۔ اس کے علاوہ، آئی ایم ایف کا وفد بینکنگ سیکٹر اور کنسٹرکشن کے شعبے میں مسابقت کا بھی جائزہ لے گا۔یہ مذاکرات پاکستان کی مالیاتی پالیسیوں، حکومتی افعال کی نگرانی اور کرپشن کے خاتمے کے اقدامات کے حوالے سے اہمیت رکھتے ہیں اور آئی ایم ایف کے ساتھ جاری تعلقات میں بہتری کے لیے ضروری ہیں۔
آئی ایم ایف مشن پاکستان میں گورننس اور کرپشن کے خاتمے کے لیے 30 محکموں کے ساتھ مذاکرات کرے گا
6
