12
استنبول( مانیٹرنگ ڈیسک)استنبول میں میئر اکرم امام اوغلو کی گرفتاری کے بعد ہونے والے احتجاج کے دوران معاشی بائیکاٹ کی ترغیب دینے والوں کے خلاف تحقیقات کا آغاز کر دیا گیا ہے۔چیف پراسیکیوٹر استنبول نے کہا ہے کہ عوام کو معاشی سرگرمیوں سے روکنے والوں کے خلاف تحقیقات جاری ہیں۔ انہوں نے مزید وضاحت دیتے ہوئے کہا کہ نفرت انگیز تقاریر کے ذریعے عوامی جذبات کو بھڑکانا قوانین کی خلاف ورزی ہے۔واضح رہے کہ 19 مارچ کو استنبول کے میئر اکرم امام اوغلو کو کرپشن کے الزامات پر گرفتار کیا گیا تھا، جس کے بعد ترکیہ کے مختلف شہروں میں احتجاج کا آغاز ہوا۔ اپوزیشن جماعتوں کی جانب سے مختلف شہروں میں مظاہرے کیے گئے ہیں اور حکومت نے اب تک سینکڑوں مظاہرین کو گرفتار کر لیا ہے۔
