بلوچستان لیویز فورس کا دہشت گردوں کے حملوں میں بزدلی دکھانے والے اہلکاروں کے خلاف کارروائی کا اعلان

کوئٹہ ( اباسین خبر)ڈائریکٹر جنرل بلوچستان لیویز فورس، عبدالغفار مگسی نے فورس کے اہلکاروں کے لیے ایک اہم سرکلر جاری کیا ہے، جس میں دہشت گردوں کے حملوں کے دوران غفلت یا بزدلی دکھانے والے اہلکاروں کے خلاف سخت کارروائی کا اعلان کیا گیا ہے۔ یہ سرکلر حالیہ دہشت گردی کے واقعات کے پیش نظر جاری کیا گیا ہے۔ڈی جی لیویز نے واضح کیا کہ اگر کسی لیویز اہلکار نے دہشت گردوں کے حملے کے دوران غفلت یا بزدلی کا مظاہرہ کیا یا اپنے ہتھیار دہشت گردوں کے حوالے کیے، تو اسے فورا ملازمت سے برطرف کر دیا جائے گا۔ ان اہلکاروں کی دوبارہ ملازمت کی درخواستوں کو کسی صورت میں قبول نہیں کیا جائے گا۔عبدالغفار مگسی نے تمام لیویز اہلکاروں کو ہدایت دی ہے کہ وہ دہشت گردوں کے حملوں کے خلاف فوری اور بہادری سے جواب دیں۔ ان کا کہنا تھا کہ بلوچستان لیویز فورس کو دہشت گردوں کے خلاف ہر ممکن اقدام اٹھانا ہوگا اور عوام کی حفاظت کے لیے اپنے فرائض ایمانداری اور بہادری سے ادا کرنے ہوں گے۔ڈی جی لیویز نے اس فیصلے کو فورس کی کارکردگی کو بہتر بنانے اور بلوچستان کی سیکیورٹی کی پوزیشن مستحکم کرنے کے لیے اہم قرار دیا۔ ان کا کہنا تھا کہ اس سرکلر کا مقصد فورس کی کارکردگی میں بہتری لانا اور بلوچستان کے عوام کو مکمل تحفظ فراہم کرنا ہے۔عبدالغفار مگسی نے مزید کہا کہ بلوچستان لیویز فورس اپنی تمام تر صلاحیتوں کو استعمال کرتے ہوئے دہشت گردوں کے خلاف کارروائیوں کو تیز کرے گی اور عوام کو تحفظ دینے کے لیے اپنی تمام تر توانائیاں بروئے کار لائے گی۔