نادیہ حسین کے سوشل میڈیا پر جھوٹے الزامات قانونا جرم ، پیکا ایکٹ کے تحت تحقیقات شروع

کراچی( شوبز ڈیسک)سوشل میڈیا پر ایف آئی اے آفیسر کے خلاف رشوت طلبی کا الزام عائد کرنے پر ماڈل اور اداکارہ نادیہ حسین کے خلاف پیکا ایکٹ کے تحت تفتیش کا آغاز کر دیا گیا ہے۔ایف آئی اے حکام کا کہنا ہے کہ نادیہ حسین کو آگاہ کیا گیا تھا کہ رشوت طلب کرنے والا ایف آئی اے کا آفیسر نہیں بلکہ ایک جعل ساز تھا، جس نے ایف آئی اے آفیسر کی تصویر لگا کر اداکارہ کو کال کی اور رشوت مانگی۔حکام نے مزید بتایا کہ نادیہ حسین کو ہدایت دی گئی تھی کہ وہ جعل ساز کے خلاف سائبر کرائم رپورٹنگ سینٹر کراچی میں شکایت درج کروائیں، تاہم انھوں نے سوشل میڈیا پر بیان دیا۔ایف آئی اے کے مطابق جعل ساز کا تعلق وہاڑی سے ہے اور اسے جلد گرفتار کر لیا جائے گا۔ ایف آئی اے حکام نے نادیہ حسین کے سوشل میڈیا پر جھوٹے الزامات کو قانونا جرم قرار دیتے ہوئے پیکا ایکٹ کے تحت تحقیقات شروع کر دی ہیں۔ایف آئی اے حکام نے کہا کہ کسی بھی فرد کو بغیر ثبوت کے بے بنیاد پروپیگنڈہ کرنے کی اجازت نہیں دی جا سکتی، اور نادیہ حسین کے الزامات ایک منظم ادارے کی ساکھ کو نقصان پہنچانے کی کوشش ہیں، جو کہ سنگین جرم ہے۔