اسلام آباد( اباسین خبر)پاکستان نے صنعتی کاروبار کو دستاویزی شکل دینے کے لیے آئی ایم ایف کی ایک اور شرط کو پورا کر لیا ہے۔ آئی ایم ایف کی شرط کے مطابق، پاکستان میں صنعتی شعبے کی پیداوار کی مانیٹرنگ کے لیے ویڈیو نگرانی کی جائے گی، جس کے لیے ڈیجیٹل آئی کے نام کا سافٹ ویئر نصب کیا جائے گا۔فیڈرل بورڈ آف ریونیو (ایف بی آر) نے اس حوالے سے سیلز ٹیکس رولز 2006 میں ترامیم کا نوٹیفکیشن جاری کر دیا ہے، جس کے تحت صنعتی اشیا کی پیداوار کی الیکٹرانک ویڈیو نگرانی کی جائے گی۔ اس عمل کے لیے سینٹرل کنٹرول یونٹ قائم کیا جائے گا، جو رئیل ٹائم میں پیداوار کا ڈیٹا ایف بی آر کو فراہم کرے گا۔ایف بی آر نے کہا ہے کہ اس مانیٹرنگ سسٹم کے بغیر مال فیکٹری سے نہیں نکل سکے گا، اور کاروباری احاطے میں پروڈکشن مانیٹرنگ کے آلات لائسنس یافتہ وینڈر کے ذریعے نصب کیے جائیں گے، جنہیں وقتا فوقتا اپ گریڈ کیا جائے گا۔ اس سسٹم کے ذریعے پیداواری ریکارڈ کا تجزیہ کیا جائے گا، جس سے قانونی کارروائی کی گنجائش پیدا ہو گی۔
پاکستان نے آئی ایم ایف کی شرط پوری کرتے ہوئے صنعتی پیداوار کی ویڈیو نگرانی کا آغاز کر دیا
1
