روزگار کے نئے مواقع فراہم کرنے کی کوشش،سندھ حکومت نے جاب پورٹل کا افتتاح کر دیا

کراچی (اباسین خبر)سندھ حکومت نے اپنے شہریوں کو روزگار کے مواقع فراہم کرنے کے لیے ایک جدید جاب پورٹل کا افتتاح کر دیا ہے۔ اس پورٹل کا مقصد صوبے کے نوجوانوں، ہنر مند افراد، اور تعلیمی طور پر مختلف پس منظر رکھنے والے افراد کو روزگار کے نئے مواقع فراہم کرنا ہے۔ افتتاحی تقریب میں وزیراعلی سندھ سید مراد علی شاہ، پیپلز پارٹی کے چیئرمین بلاول بھٹو زرداری، سینئر صوبائی وزیر شرجیل انعام میمن اور مختلف اہم شخصیات نے شرکت کی۔شرجیل انعام میمن نے اس موقع پر کہا کہ سندھ میں 65 فیصد نوجوانوں کی آبادی ہے اور یہ پورٹل ان تمام افراد کے لیے ہے جو روزگار کے خواہشمند ہیں، چاہے وہ پڑھے لکھے ہوں یا ہنر مند۔ انہوں نے بتایا کہ حکومت نے نہ صرف سرکاری بلکہ نجی شعبے کے اداروں سے بھی اس پورٹل کے ذریعے روزگار فراہم کرنے کی درخواست کی ہے۔وزیراعلی سندھ سید مراد علی شاہ نے کہا کہ اس پورٹل کے ذریعے صوبے کے نوجوانوں کو روزگار کے مواقع ملیں گے اور اس کے ساتھ ساتھ اس میں رجسٹریشن کرنے والے افراد کو شفاف طریقے سے نوکریاں فراہم کی جائیں گی۔ انہوں نے مزید کہا کہ 1 سے 4 گریڈ کی نوکریوں کا اشتہار بھی اس پورٹل پر دیا جائے گا اور آئی بی اے کے ذریعے 5 سے 15 گریڈ کی نوکریوں کا عمل جاری رکھا جائے گا۔انہوں نے اس بات کا بھی عندیہ دیا کہ اس جاب پورٹل کے ذریعے عارضی نوکریوں کو بھی شامل کیا جائے گا تاکہ زیادہ سے زیادہ لوگ اس سے فائدہ اٹھا سکیں۔بلاول بھٹو زرداری کے وژن کو سامنے رکھتے ہوئے، سندھ حکومت کا مقصد نہ صرف مردوں بلکہ خواتین کو بھی روزگار کے قابل بنانا ہے۔ پورٹل کے ذریعے مختلف شعبوں میں لوگوں کی بھرتی کی جائے گی اور اس سے سندھ کی ترقی میں مزید مدد ملے گی۔اس پورٹل کے ذریعے سندھ کے شہریوں کو بہتر روزگار کے مواقع فراہم کرنے کے ساتھ ساتھ حکومت سندھ کی ترقیاتی پالیسیوں کو بھی مزید فعال بنانے کی کوشش کی جا رہی ہے۔