آسمان پر سرخ روشنی، رواں سال کا پہلا مکمل چاند گرہن کل ہو گا

کراچی( مانیٹرنگ ڈیسک)رواں سال کا پہلا مکمل چاند گرہن کل (14 مارچ) کو ہوگا۔محکمہ موسمیات کے مطابق، چاند گرہن کا آغاز جمعہ کو صبح 8:57 پر پاکستانی وقت کے مطابق ہوگا، اور مکمل چاند گرہن 11:58 پر لگے گا۔ چاند گرہن کا اختتام 3 بجے ہوگا۔محکمہ موسمیات کا کہنا ہے کہ چاند گرہن کے دوران آسمان سرخ رنگ کی روشنی سے منور ہو جائے گا۔ یہ تقریبا 3 سال بعد پہلا چاند گرہن ہوگا، اور آخری بار یہ واقعہ 2022 میں پیش آیا تھا۔اس حوالے سے بتایا گیا ہے کہ چونکہ چاند گرہن دن کے اوقات میں ہوگا، اس لیے پاکستان میں اسے دیکھنا ممکن نہیں ہوگا، لیکن یہ نظارہ شمالی اور جنوبی امریکا میں دیکھا جا سکے گا۔واضح رہے کہ چاند گرہن اس وقت ہوتا ہے جب زمین سورج اور چاند کے درمیان آ جاتی ہے۔ چاند گرہن سورج گرہن کی طرح کھلی آنکھ سے دیکھنے میں بصارت کو کوئی نقصان نہیں پہنچاتا۔ دوسری طرف، رواں سال کا پہلا سورج گرہن 29 مارچ کو ہوگا، جو کہ پاکستان میں نہیں دکھائی دے گا۔