خیبر پختونخوا میں مسلسل بارشیں، بالائی علاقوں میں برفباری، بارشوں کے نتیجے میں 4 افراد جاں بحق

پشاور( اباسین خبر)خیبر پختونخوا میں تین دن سے مسلسل بارشوں کا سلسلہ جاری ہے، جس سے پشاور شہر اور گرد و نواح میں موسم خوشگوار ہوگیا ہے۔ بارشیں وقفے وقفے سے جاری ہیں، اور گزشتہ رات ہونے والی بارش سحری تک رک گئی، جس کے بعد موسم میں سردی اور تازگی آ گئی۔بالائی علاقوں میں، جیسے کہ چترال، دیر، سوات، شانگلہ، بونیر اور دیگر اضلاع میں برفباری کا سلسلہ بھی جاری ہے۔ پہاڑوں پر برفباری کے باعث موسم شدید سرد ہوگیا ہے، جس نے سیاحوں کو ان علاقوں کی طرف متوجہ کیا ہے۔محکمہ موسمیات کے مطابق، پشاور اور صوبے کے دیگر بیشتر اضلاع میں کل بھی بارش اور پہاڑوں پر مزید برفباری کا امکان ہے۔خیبر میں بارشوں کے نتیجے میں نقصانات:ضلع خیبر کی تحصیل باڑہ میں بارشوں کے باعث چھتیں گرنے سے 4 افراد جاں بحق ہو گئے ہیں۔ وادی تیراہ کے علاقے میدان برقمبر خیل یارگل خیل میں بارش کے باعث گھر کی چھت گر گئی، جس سے گھر کا سربراہ بسم اللہ، اس کی بیوی اور کمسن بچی جاں بحق ہو گئے۔اسی طرح باڑہ کے نواحی علاقے چلگزی شکونڈو دارہ میں صابر کے دو منزلہ کمرے کی چھت گرنے سے اس کی ایک بچی جاں بحق اور دو زخمی ہو گئیں۔چترال میں برفباری سے مشکلات:چترال میں حالیہ برفباری کے باعث اپر چترال بروغل روڈ پر کئی دنوں سے گاڑیوں کی آمدورفت بند ہے، جس سے مسافروں اور مقامی افراد کو مشکلات کا سامنا ہے۔ اس کے علاوہ، پرسان روڈ تنگ کے مقام پر لینڈ سلائیڈنگ سے راستہ بند ہوگیا، جس کے باعث عوام دونوں جانب پھنس کر رہ گئے۔حالات کے پیش نظر حکام نے ہدایت کی ہے کہ شہری اور سیاح احتیاط سے کام لیں اور غیر ضروری سفر سے گریز کریں۔