1
لاہور( ہیلتھ ڈیسک)صوبائی دارالحکومت لاہور کے میو ہسپتال کی چیسٹ وارڈ میں انجکشن کے مبینہ ری ایکشن سے دو مریض زندگی کی بازی ہار گئے۔مبینہ طور پر انجکشن لگنے سے مزید 14 مریض متاثر ہوئے، جن میں سے 3 مریض وینٹی لیٹر پر ہیں۔ ہسپتال میں انجکشن کا استعمال فورا روک دیا گیا ہے، جبکہ معاملے کی تحقیقات کے لیے انکوائری کمیٹی قائم کردی گئی ہے، جس کا نوٹیفکیشن بھی جاری کردیا گیا ہے۔نوٹیفکیشن کے مطابق پروفیسر اسرار الحق کمیٹی کے سربراہ ہوں گے، اور کمیٹی میں چیف فارماسسٹ، ڈپٹی نرسنگ، اے ایم ایس ہسپتال کو بھی شامل کیا گیا ہے۔صوبائی وزیر صحت خواجہ سلمان رفیق نے کہا ہے کہ ہسپتال میں انجکشن کا استعمال فوری طور پر روک دیا گیا ہے، اور خصوصی کمیٹی معاملے کی تحقیقات کرے گی۔ اس کے بعد ذمہ دار افراد کے خلاف کارروائی کی جائے گی۔
