عارف علوی کے کلینک کے خلاف ایس بی سی اے کو ئی کارروائی نہ کرے: سندھ ہائیکورٹ

کراچی ( اباسین خبر)سندھ ہائی کورٹ نے ڈاکٹر عارف علوی کے ڈینٹل کلینک کے خلاف ایس بی سی اے کی کارروائی کو روک دیا ہے۔ کراچی میں ڈاکٹر عارف علوی کے کلینک کے سیل کیے جانے کے خلاف دائر درخواست کی سماعت کے دوران عدالت نے ایس بی سی اے کو کلینک کے خلاف قانونی تقاضے پورے کیے بغیر کسی بھی کارروائی سے روک دیا۔درخواست گزار کی وکیل بیرسٹر علی نے عدالت کو بتایا کہ یہ معاملہ کلینک کو ڈی سیل کرنے کا ہے۔ عدالت نے سوال اٹھایا کہ رہائشی علاقے میں کمرشل سرگرمیاں کیوں ہو رہی ہیں اور کیا ایس بی سی اے سے اس معاملے میں قانونی تقاضے پورے کرنے کے بعد ہی کارروائی کی گئی؟ وکیل نے بتایا کہ درخواست گزار نے ایس بی سی اے سے مقررہ مدت میں رابطہ کیا تھا، اور پولیس نے بھی ایس بی سی اے حکام کے ساتھ کلینک کو سیل کیا تھا۔اس پر ایس بی سی اے کے وکیل نے کہا کہ معاملہ مزید کارروائی کے لیے ماسٹر پلان اتھارٹی کو بھیجا گیا ہے۔ تاہم، درخواست گزار کے وکیل نے خدشہ ظاہر کیا کہ کلینک دوبارہ سیل کر دیا جائے گا جیسا کہ پہلے بھی رات کے وقت ایسا کیا گیا تھا۔جسٹس نثار احمد بھمبرو نے اس بات پر سوال اٹھایا کہ کس قانون کے تحت رہائشی علاقے میں کمرشل سرگرمیاں چلائی جا رہی ہیں۔