چینی کمپنی کی ملازمین کیلئے انو کھی شر ط،شادی کرو ورنہ نوکری سے فارغ

بیجنگ ( مانیٹرنگ ڈیسک)چینی کمپنی کی جانب سے غیر شادی شدہ اور طلاق یافتہ ملازمین کے لیے منفرد پالیسی کا اعلان ایک سنسنی خیز معاملہ بن گیا ہے، جس پر عوامی اور قانونی سطح پر شدید ردعمل آ رہا ہے۔ شانڈونگ صوبے میں قائم کیمیکل کمپنی نے جنوری میں ایک نوٹس جاری کیا، جس میں کہا گیا کہ اگر 28 سے 58 سال کی عمر کے سنگل یا طلاق یافتہ ملازمین نے ستمبر تک شادی نہیں کی تو انہیں نوکری سے فارغ کر دیا جائے گا۔کمپنی کا مقصد شادی شدہ ملازمین کی شرح میں اضافہ کرنا تھا، اور اس نوٹس میں کہا گیا کہ جو ملازمین مارچ تک شادی نہیں کریں گے، انہیں اپنی غلطی پر معذرت کا خط جمع کرانا ہوگا۔ جون تک غیر شادی شدہ ملازمین کی جانچ کی جائے گی، اور اگر انہوں نے ستمبر تک شادی نہ کی تو انہیں برخاست کر دیا جائے گا۔اس پالیسی پر عوام کی جانب سے شدید تنقید کی جا رہی ہے، کیونکہ یہ ملازمین کے ذاتی معاملات میں مداخلت کرتی ہے اور ان کے حقوق کو متاثر کر سکتی ہے۔ قانونی ماہرین نے اس پالیسی کو چین کے آئین کے خلاف قرار دیا ہے کیونکہ چین کے لیبر قوانین کے تحت کمپنیاں ملازمین سے شادی یا بچوں کی منصوبہ بندی کے بارے میں سوال کرنے کی مجاز نہیں ہیں۔چین میں شادی کی شرح میں کمی آنے کی وجہ سے حکومت نے مختلف اقدامات کیے ہیں، جیسے Shanxi صوبے میں 35 سال کی عمر سے پہلے شادی کرنے والے جوڑوں کو انعام دینے کا پروگرام، تاکہ شادی کی شرح میں اضافہ ہو سکے۔یہ پالیسی اس بات کا غماز ہے کہ چین میں خاندانوں اور شادی کی اہمیت کو بڑھانے کے لیے حکومتی اور نجی سطح پر اقدامات کیے جا رہے ہیں، لیکن اس طرح کی پالیسیاں ملازمین کے ذاتی آزادیوں اور حقوق کی خلاف ورزی بھی ہو سکتی ہیں۔