واٹس ایپ میں صارفین کے لیے ایک نئے بہترین فیچر کا اضافہ

کیلیفورنیا( مانیٹرنگ ڈیسک)واٹس ایپ میں ایک نیا فیچر متعارف کرایا جا رہا ہے جو کالنگ کے تجربے کو مزید بہتر بنائے گا۔ یہ فیچر بیٹا ورژن میں کچھ صارفین کے لیے دستیاب ہے، جس کے تحت کال مینیو کو انفرادی اور گروپ چیٹس کے لیے اپ ڈیٹ کیا جائے گا۔نئے فیچر کے مطابق، کال مینیو چیٹ باکسز کے اوپر لایا جائے گا، جس کے نتیجے میں چیٹ ونڈو میں موجود وائس اور ویڈیو کالز کے بٹنز کو ختم کر کے انہیں ایک ہی بٹن میں اکٹھا کر دیا جائے گا۔ جب اس بٹن پر کلک کیا جائے گا تو ایک پوپ اپ مینیو کھلے گا جس میں صارف وائس یا ویڈیو کال کے درمیان انتخاب کر سکے گا۔اس نئے فیچر کے ذریعے، صارفین گروپ کالز میں مخصوص افراد کو منتخب کر کے ان کو کال کر سکیں گے، جو اس سے قبل ممکن نہیں تھا، کیونکہ گروپ کال میں تمام اراکین کو کال آ جاتی تھی۔اس فیچر میں ایک اور خاصیت بھی شامل کی جا رہی ہے جس کے تحت کال میں شامل کرنے کے لیے لنک شیئر کرنے کا شارٹ کٹ فراہم کیا جائے گا، جس سے کسی بھی کال میں نئے افراد کو مدعو کرنا اور بھی آسان ہو جائے گا۔دسمبر 2024 میں واٹس ایپ نے ویڈیو اور آڈیو کالنگ کے تجربے کو بہتر بنانے کے لیے نئے فیچرز متعارف کرائے تھے، جن میں ویڈیو کالنگ ایفیکٹس اور ڈیسک ٹاپ ورژن میں کالنگ کی بہتری شامل تھی۔