سندھ ؛پرائس لسٹ آویزاں نہ کرنے والے اسلحہ دکانداروں کیخلاف کارروائی کا فیصلہ

کراچی ( اباسین خبر)سندھ حکومت نے پرائس لسٹ آویزاں نہ کرنے والے اسلحے کے دکانداروں کے خلاف کارروائی کا فیصلہ کیا ہے۔اسسٹنٹ ڈائریکٹر بیورو آف سپلائی میر شاہنواز کے مطابق صوبے بھر میں اسلحہ فروخت کرنے والے ڈیلرز کو ایک ہی قیمت مقرر کرنی ہوگی اور اس قیمت کی ریٹ لسٹ دکانوں پر آویزاں کرنا ضروری ہوگا۔ حکومتی احکامات پر عمل نہ کرنے والے دکانداروں کے خلاف قانونی کارروائی کی جائے گی اور ان کی دکانیں سیل کر دی جائیں گی۔انہوں نے مزید کہا کہ اسلحہ اور بارودی مواد فروخت کرنے والے ڈیلرز کے لیے یہ لازم ہے کہ وہ کنزیومر پروٹیکشن ایکٹ کے تحت اپنے مصنوعات کی قیمت لسٹ پر آویزاں کریں۔ کنزیومر پروٹیکشن ایکٹ کا سیکشن 18 کہتا ہے کہ کوئی بھی چیز بیچنے کے وقت اس کی قیمت درج کرنا ضروری ہے۔اسسٹنٹ ڈائریکٹر بیورو آف سپلائی نے بتایا کہ حکومتی احکامات پر عملدرآمد نہ کرنے پر محکمہ بیورو آف سپلائی پرائسز نے سندھ کنزیومر پروٹیکشن ایکٹ کے تحت عدالت میں شکایت جمع کرائی ہے، جس پر عدالت نے 13 مارچ کو سماعت کی تاریخ مقرر کی ہے۔ شکایت سندھ کنزیومر پروٹیکشن ایکٹ 2014 کے سیکشن 26 اور دیگر متعلقہ دفعات کے تحت درج کی گئی ہے۔