بلوچستان میں امن و امان کی صورتحال باعث تشویش ہے ،بار کونسل

کوئٹہ( اباسین خبر)بلوچستان بار کونسل نے حب میں لاپتہ بلوچ افراد کے دھرنے میں خواتین اور بچوں پر تشدد، لاٹھی چارج کے استعمال اور خواتین کی گرفتاری کی شدید مذمت کی ہے۔ بیان میں کہا گیا کہ بلوچستان میں امن و امان کی صورتحال روز بروز بگڑ رہی ہے اور شاہراہوں کی بندش کے ساتھ ساتھ ماورائے آئین و قانون گرفتاریوں میں بھی اضافہ ہو رہا ہے۔بلوچستان بار کونسل نے موجودہ صوبائی حکومت کی کارکردگی پر تنقید کرتے ہوئے کہا کہ حکومت عوام کے مسائل حل کرنے میں مکمل طور پر ناکام ہو چکی ہے۔ بلوچستان میں کرپشن، لوٹ کھسوٹ اور بیڈ گورننس کی انتہا ہو چکی ہے اور عوام کا موجودہ صوبائی حکومت اور وفاقی حکومت سے اعتماد اٹھ چکا ہے۔بیان میں مزید کہا گیا کہ لاپتہ افراد کا معاملہ انتہائی سنگین صورتحال اختیار کر چکا ہے اور ان کے لواحقین روزانہ کی بنیاد پر اپنے پیاروں کی بازیابی کے لیے احتجاج کر رہے ہیں، جس کے باعث بلوچستان کا دوسرے صوبوں سے رابطہ منقطع ہو چکا ہے۔ عدلیہ کے حوالے سے بھی عوام کا اعتماد کم ہو چکا ہے، کیونکہ شنوائی نہ ہونے کی وجہ سے وہ عدالتوں میں جانے سے مایوس ہو چکے ہیں۔بلوچستان بار کونسل نے کہا کہ موجودہ صوبائی حکومت صرف مال بنانے میں مصروف ہے، کرپشن، اقربا پروری اور لاقانونیت عروج پر ہے۔ بیان میں حب بھوانی کے مقام پر لاپتہ افراد کے دھرنے میں طاقت کے استعمال، خواتین اور بچوں پر لاٹھی چارج، تشدد اور خواتین کی گرفتاری کو قابل مذمت قرار دیتے ہوئے مطالبہ کیا کہ حکومت فوری طور پر لاپتہ افراد کی بازیابی کے لیے اقدامات اٹھائے اور گرفتار خواتین اور بچوں کو فوری طور پر رہا کیا جائے۔