وزیراعظم کی آذربائیجان سے دستخط شدہ مفاہمتی یادداشتوں و معاہدوں پر تیزی سے عملدرآمد کی ہدایت

اسلام آباد( اباسین خبر)وزیرِ اعظم محمد شہباز شریف نے حالیہ دورہ آذربائیجان کے دوران دستخط شدہ مفاہمتی یادداشتوں و معاہدوں کو جلد عملی جامہ پہنانے کی ہدایت کی ہے۔جائزہ اجلاس میں وزیرِ اعظم نے وزارتِ تجارت کو پاکستان اور آذربائیجان کے مابین موجودہ تجارت کے حجم کو 2 ارب ڈالر تک پہنچانے کے لیے جامع لائحہ عمل پیش کرنے کی ہدایت کی۔وزیرِ اعظم نے آذربائیجان کے صدر کی جانب سے پاکستان میں 2 ارب ڈالر کی سرمایہ کاری کے اعلان کے بعد نائب وزیرِ اعظم و وزیرِ خارجہ اسحاق ڈار کی زیر نگرانی کمیٹی قائم کرنے کی ہدایت کی، جو توانائی اور بنیادی ڈھانچے کے شعبوں میں معاہدوں کے لیے تیاری کو یقینی بنائے گی۔وزیرِ اعظم نے آذری صدر کے آئندہ ماہ متوقع دورہ پاکستان سے پہلے تمام تیاریاں مکمل کرنے کی ہدایت کرتے ہوئے آذربائیجان سمیت ایسے تمام ممالک میں، جہاں پاکستان کے ساتھ تجارت کی وسیع استعداد موجود ہے، ٹریڈ افسران کی تعیناتی کی بھی ہدایت دی۔اجلاس سے گفتگو میں وزیرِ اعظم نے کہا کہ پاکستان اور آذربائیجان کے مابین دیرینہ برادرانہ تعلقات ہیں جو دہائیوں پر محیط ہیں، اور پاکستان اور وسط ایشیائی ریاستوں کے مابین تجارت و سرمایہ کاری کی وسیع استعداد سے بھرپور فائدہ اٹھانے کے لیے اقدامات کیے جا رہے ہیں۔وزیرِ اعظم کو باکو میں منعقدہ مشترکہ بزنس فورم کی معلومات دی گئیں، جس میں 83 پاکستانی اور 101 آذربائیجان کی کمپنیوں نے شرکت کی۔ اجلاس میں بتایا گیا کہ وزیرِ اعظم کے دورے کے دوران پاکستان اور آذربائیجان کے مابین 13 مفاہمتی یادداشتوں و معاہدوں پر دستخط ہوئے تھے۔اجلاس میں نائب وزیرِ اعظم و وزیرِ خارجہ اسحاق ڈار، وفاقی وزرا احد خان چیمہ، جام کمال خان، عبدالعلیم خان، ڈاکٹر مصدق ملک، معاون خصوصی طارق فاطمی اور متعلقہ اعلی حکام نے شرکت کی۔