پاکستان کا فلسطینیوں کو اجتماعی سزا کا نشانہ بنانے پر اسرائیل کو جوابدہ ٹھہرانے کا مطالبہ

اسلام آباد( اباسین خبر)پاکستان نے لاکھوں مظلوم فلسطینیوں کو اجتماعی سزا کا نشانہ بنانے پر اسرائیل کو جواب دہ ٹھہرانے کا مطالبہ کردیا۔پاکستان نے مستقل جنگ بندی اور تنازع کے دو ریاستی حل پر مکمل عملدرآمد کا مطالبہ بھی کیا، اور اسرائیل کی طرف سے رمضان المبارک میں غزہ میں امدادی سامان کی ترسیل روکنے کی شدید مذمت کی۔ترجمان دفتر خارجہ کے مطابق، غزہ میں انسانی ہمدردی کی بنیاد پر امداد کی بندش اسرائیل کی منظم مہم کا حصہ ہے، اور فلسطینیوں کو امداد کی بندش بین الاقوامی قوانین کی صریح خلاف ورزی ہے۔ انہوں نے کہا کہ یہ اقدام جنگ بندی معاہدے کے لئے خطرہ بن سکتا ہے۔دفتر خارجہ کے ترجمان نے مزید کہا کہ عالمی برادری غزہ میں انسانی امداد کی فراہمی یقینی بنائے تاکہ فلسطینیوں کو امداد کی فراہمی میں کسی قسم کی رکاوٹ نہ آئے۔