سلمان خان اور رشمیکا مندانا کی فلم سکندر کا پہلا نغمہ ’ زہرہ جبیں ‘ ریلیز

ممبئی ( شوبز ڈیسک)بالی ووڈ کی نئی فلم سکندر کا پہلا نغمہ “زہرہ جبیں” ریلیز کر دیا گیا ہے، جس میں سلمان خان اور رشمیکا مندانا کی کیمسٹری نے مداحوں کو محظوظ کر دیا ہے۔ یہ فلم رواں سال عید کے موقع پر ریلیز ہوگی۔سکندر کے ٹیزر کی کامیاب ریلیز کے بعد فلم کا پہلا نغمہ “زہرہ جبیں” جاری کیا گیا ہے، جس میں رشمیکا مندانا نے سیاہ اور سلور رنگ کا شاندار لباس پہنا ہے اور وہ سیڑھیوں سے اترتے ہوئے دلکش نظر آ رہی ہیں۔نغمے کی ابتدا میں رشمیکا کی پرفارمنس کے بعد بالی ووڈ کے معروف اداکار سلمان خان کی انٹری ہوتی ہے۔ اس نغمے کی موسیقی پریتم نے ترتیب دی ہے، جبکہ اس کی کوریوگرافی معروف رقاصہ فرح خان نے کی ہے۔ گانے کو نکاش عزیز اور دانش صابری نے گایا ہے۔رشمیکا مندانا نے حال ہی میں اپنے تجربات شیئر کرتے ہوئے کہا کہ، “مجھے لگتا ہے کہ میرے خواب کو تعبیر مل گئی ہے”۔ انہوں نے سلمان خان کے ساتھ کام کرنے کے اپنے تجربات پر خوشی کا اظہار کیا۔یاد رہے کہ سکندر کا ٹیزر 27 فروری 2025 کو ریلیز کیا گیا تھا، اور اس فلم میں سلمان خان اور رشمیکا مندانا کے علاوہ پریتک ببر، ستیہ راج، کاجل اگروال اور دیگر اداکار بھی اہم کرداروں میں نظر آئیں گے۔فلم سکندر کو ساجد ناڈیاوالا نے پروڈیوس کیا ہے جبکہ اس کی ہدایتکاری اے آر موروگاداس نے کی ہے۔