ہر دن نیا چیلنج لے کر آتا ہے،امیتابھ بچن کی یادداشت جواب دینے لگی

ممبئی( شوبز ڈیسک) بالی وڈ کے لیجنڈری اداکار امیتابھ بچن نے اپنی عمر بڑھنے کے ساتھ پیش آنے والی مشکلات پر کھل کر بات کی ہے۔ 82 سالہ اداکار نے اپنے ذاتی بلاگ میں اعتراف کیا کہ انہیں ڈائیلاگ یاد کرنے میں دشواری ہوتی ہے اور کبھی کبھار وہ رات گئے ہدایت کار کو کال کرکے دوبارہ شوٹنگ کی درخواست کرتے ہیں۔امیتابھ بچن نے اپنی پوسٹ میں لکھا، “عمر بڑھنے کے ساتھ صرف ڈائیلاگ یاد رکھنا ہی چیلنج نہیں بلکہ دیگر مشکلات بھی درپیش ہوتی ہیں، جن کا سامنا اداکاری کے دوران کرنا پڑتا ہے۔”اداکار نے یہ بھی انکشاف کیا کہ فلم کی شوٹنگ کے بعد انہیں اپنی غلطیوں کا احساس ہوتا ہے اور وہ ہدایت کار سے دوبارہ موقع دینے کی درخواست کرتے ہیں۔انہوں نے مزید کہا کہ شہرت کی ناپائیداری کا سامنا بھی ہوتا ہے۔ “ہر دن نیا چیلنج لے کر آتا ہے، مگر وقت کسی کا انتظار نہیں کرتا۔ مداحوں کا جوش وقت کے ساتھ کم ہوتا جاتا ہے، یہ ایک قدرتی عمل ہے۔”امیتابھ بچن نے فلم انڈسٹری کے مالی معاملات کو بھی پیچیدہ قرار دیا اور کہا کہ انہیں پروڈکشن، لاگت، مارکیٹنگ، اور نمائش کی دنیا سمجھ میں نہیں آتی۔ “یہ سب کچھ ایک دھندلی اور ناقابلِ فہم دنیا لگتی ہے۔”فی الحال، امیتابھ بچن مشہور گیم شو “کون بنے گا کروڑ پتی” کی میزبانی کر رہے ہیں اور ان کے دیگر فلمی پروجیکٹس پر بھی کام جاری ہے۔